Shymkentte nan baǵasy kúrt kóterildi

  TÚRKІSTAN. QazAqparat  - Shymkentte nannyń baǵasy kúrt kóterildi. Kúni búginge deıin dúken sórelerinde 45-50 teńgeden satylyp kelgen bólke nan 55-65 teńgege qymbattaǵan, dep habarlaıdy QazAqparat tilshisi.

Satýshylar bolsa bul ózgeristi nan pisiretinderge baılanysty dep otyr. ıAǵnı, naýbaıhana qyzmetkerleri  birer kún buryn baǵanyń 10 teńge shamasynda kóteriletinin eskertken.

«Nan daıyndaıtyndar «tutynýshylarǵa aldyn ala eskertińder, biz kelesi aptadan bastap baǵany kóteremiz dep aıtty. Sodan kesheden bastap 45 teńgelik bólkeni 55 teńgeden satyp jatyrmyz. Bázbireýler 60-65 teńgeden de satýda. Amal joq solaı satyp jatyrmyz»,- deıdi dúkendegi satýshy Symbat Dosqaraeva.

Al, shym shahardyń naýbaıhanashylary bolsa baǵany kóterýge unnyń qymbattaýy sebep, sondyqtan 10 teńgege kóterdik dep otyr.

«Buǵan deıin biz jeńildetilgen baǵamen beriletin unmen amaldap kelgen bolatynbyz. Alaıda sońǵy kezde un baǵasy ósti. 50 keli qaptaǵy un 3100 teńgeden satylsa, qazir 3900 teńge turady. Burynǵydaı dotatsııa da berilmeıdi. Onyń ústine  jaryq pen sý, gazǵa tóleıtin kommýnaldyq tólemder de qymbattaǵan.  Osynyń bári nan baǵasynyń kóterilýine ákep otyr»,- deıdi «Nan» naýbaıhanashylar qaýymdastyǵynyń tóraǵasy Ábdimálik Kómekbaev.

Aıta keteıik, Shymkentte nan baǵasy sońǵy ret eki jyl buryn qymbattaǵan bolatyn. Onda da birden 10 teńgege kóterilgen edi.