Shymkentte múmkindigi shekteýli azamattar úshin arnaıy ǵımarat boı kóteredi
Eske salsaq, búgin vıtse-premer Gúlshara Ábdiqalyqova bastaǵan úkimettik toppen shymkenttik kásipkerler kezdesken bolatyn.
Jıynda vıtse-premer qalanyń aýdan ákimderimen, kásiporyndar men mekeme basshylary jáne kásipkerlermen, kásipodaq uıymdarynyń ókilderimen júzdesip, áleýmettik áriptestikti damytý jáne áleýmettik jaýapkershilik máseleleri týrasynda ózekti máselerdi talqyǵa saldy.
Gúlshara Ábdiqalyqova Elbasynyń «Qazaqstan áleýmettik baǵyttardy basymdyqqa alý» tapsyrmasyn negizge ala otyryp, qoǵamda masyldyqqa, enjarlyqqa jol bermeý kerektigine toqtaldy. Bıznes qaýymdastyqtary men kásipkerlerge turmysy tómen otbasylaryna barynsha kómek kórsetý kerektigin aıtyp, olardyń túıtkildi máselelerin der kezinde sheshýde belsendi bolýǵa shaqyrdy.
Alqaly basqosýda Shymkent qalasynyń ákimi Ǵabıdolla Ábdirahymov shaharda múmkindigi shekteýli azamattar úshin arnaıy nysan salynatynyn aıtty.
«Jaqyn ýaqytta múmkindigi shekteýli azamattar úshin arnaıy ǵımarat salyp berýdi josparlap otyrmyz. Onda salaýatty ómir saltyn ustaný úshin arnaıy zaldar bolady», - dedi qala ákimi.
Bul ǵımarattyń boı kóterýine «Otaý Stroı» kompanııasynyń jetekshisi, belgili metsenat Qaırat Moldaseıitov bıznestiń áleýmettik jaýapkershiligi aıasynda qol ushyn sozbaq. Búginde atalǵan kompanııada 765 qyzmetker eńbek etedi. Onyń ishinde 72 kópbalaly ana, 15 múmkindigi shekteýli azamat bar.
Aıta ketsek, Shymkentte halyqtyń áleýmettik osal toptaryn qoldaý maqsatynda 2019 jyly qalalyq bıýdjet qarajaty esebinen 100 ınvestıtsııalyq jobany iske asyrý josparlanǵan, onyń 30-y - turǵyn úı qurylysy, 15-i - bilim salasy, 36-y - ınjenerlik ınfraqurylymdardy jańǵyrtý, 19-y - kólik ınfraqurylymy boıynsha.
Olardy oryndaý nátıjesinde 22 myńnan astam jańa jumys orny ashylady. Sondaı-aq Shymkentte mamyr aıynda áleýmettik jaǵdaıy tómen 540 otbasyǵa páter berilmek. Onyń ishinde kópbalaly analarǵa 177 páter berý josparlanýda.
