ShYMKENT. QazAqparat – Shymkent qalasyndaǵy «Túrkistan» saraıynda aqyn, dramatýrg Muhtar Shahanovtyń «Bódene talanttar men Qajymuqandar» atty shyǵarmashylyq án-jyr keshi ótti, dep habarlaıdy QazAqparat tilshisi.
Aqynnyń shyǵarmashylyq keshine arnaıy qatysqan Shymkent qalasynyń ákimi Erlan Aıtahanov Muhtar Shahanovtyń qazaq ádebıetiniń abyzy retinde elimizge orasan zor eńbegin atap ótti. «Elbasy «Bolashaqqa baǵdar: Rýhanı jańǵyrý» maqalasynda ulttyq jańǵyrý uǵymy - ulttyq sananyń kemeldenýin bildiretinin aıtyp, qazirgi tańda ulttyq sana-sezim kókjıegin keńeıtý kerektigine toqtalǵan bolatyn. Al, osy kókjıekti keńeıtetin aqyn-jazýshylar ekeni aıtpasa da túsinikti. Olar halyqty rýhanı sýsyndatyp, sanalaryna ulttyq kodty sińirýge tyrysady. Al, ulttyq kod – Máńgilik Elge bastar qadam. Osy baǵytta qazaq ádebıetiniń abyzy retinde elimizge orasan zor eńbegińizdi erekeshe atap ótkim keledi. Muhtar Shahanov - álem aqyny. Sebebi, qazaqtyń Muhtaryn álem moıyndaǵan», - dedi Erlan Aıtahanov.
Shara barysynda kórermender kesh ıesi jaıyndaǵy derekti fılmdi tamashalap, rýhanı azyq aldy. Rýhanı keshte Qazaqstan Respýblıkasynyń Mádenıet qaıratkeri, estrada ánshisi Hadısha Shalabaeva jáne ánshi Sandýǵash Stamǵazıeva aqynnyń avtorlyq ánderin shyrqap, qazaq rýhyn asqaqtatty. Sonymen qatar, Shymkent qalasy mádenıet úıiniń ánshileri jáne qara óleńdi janyna serik etken Shahanov izbasarlary án-jyrdan shashý shashty.
Aıta keteıik, Muhtar Shahanovtyń «Jubaılar jyry», «Týǵan kún keshinde», «Gúl dáýren», «Men saǵan ǵashyq edim» atty ánderi el aýzynda. Sonymen qatar, birneshe óleń kitabynyń jáne halyq arasyna keń taraǵan birqatar ánniń avtory. Balladalary men poemalary 20-dan astam tilge aýdarylǵan. «Mahabbat zańy», «Senim patshalyǵy», «Sokratty eske alý túni» atty dramalary respýblıkamyzda jáne shetel teatrlarynda qoıylǵan.
Eske salaıyq, búgin qaladaǵy «Otyrar» kitaphanasynda daraboz aqynnyń «Órkenıettiń adasýy» kitabynyń tusaýy kesilip, «Jalyn» jýrnalynyń 50 jyldyǵy atalyp ótken bolatyn.
