Shymkentte múgedekter úshin áleýmettik-pedagogıkalyq qyzmet kórsetýdiń biregeı ortalyǵy ashyldy

Qalalyq jumyspen qamtýdy úılestirý jáne áleýmettik baǵdarlamalar bólimi qyzmetkerleriniń aıtýynsha, ortalyq qyzmetin ózdiginen júrip tura almaıtyn 700 adam  paıdalanady. Mundaı jandardyń qatarynda júıke júıesi-nevrologııalyq aýytqýy bar jáne tirek-qozǵalys apparaty buzylǵan múgedek balalar men eresekter,  І jáne ІІ toptaǵy múgedekter,  jasy tolýyna baılanysty ózin-ózi qamtamasyz ete almaıtyn turǵyndar bar. Olar  ortalyqtaǵy pedıatr, terapevt, nevropatolog, psıhıatr, travmatolog-ortoped, orta dárejeli medıtsına personaly, tárbıeshiler, defektologtar, ádisker, logoped jáne psıholog syndy bilikti mamandardyń qyzmetine júgine alady. Bazbir balalar úshin Montessorı kabıneti jumys isteıdi. Onda balalardyń aqyl-oı múmkindigin ashyp, damytýǵa barlyq jaǵdaı jasalǵan. Al sensorly kabınette mamandar psıhıologııalyq jumys júrgizip qana qoımaı, balalardyń usaq motorıkasyn damytpaq.

«Múgedek jandarǵa osy qyzmetterge qol jetkizý úshin áleýmettik-psıhologııalyq saraptama komıssııasy (ÁPSK) bergen jeke ońaltý baǵdarlamasyn ortalyq qyzmetkerlerine usyný jetkilikti. Bul qujatta múgedek janǵa qajetti ońaltý áreketiniń barlyǵy - kúndizgi statsıonar, emdik jattyǵý, em alý merzimi, qajetti gıgıenalyq quraldar kórsetilgen. Bizde kórsetilmeıtin jalǵyz qyzmet - bul statsıonarda tolyǵymen qalý. Ol oblystyq ortalyqta kórsetiledi. Biz tek kúndizgi statsıonardy nemese úıge baryp áleýmettik qyzmet kórsetýdi usyna alamyz. Kúndizgi statsıonar 32 tósek-orynǵa shaqtalǵan», - dedi Shymkent qalasy ákiminiń orynbasary Gúljan Qurmanbekova.

Aıta ketý kerek, Shymkent qalalyq ákimdigine qarasty «Halyqqa áleýmettik qyzmet kórsetýdiń qalalyq aýmaqtyq ortalyǵy» 2011 jyldyń aqpanynda qurylǵan bolatyn. Ótken jyly mekeme Shymkent qalasy ákimdiginiń «Halyqqa áleýmettik qyzmet kórsetýdiń qalalyq aýmaqtyq ortalyǵy» bolyp qaıta quryldy. Osydan keıin ortalyqta halyqqa burynǵydan da keń aýqymda qyzmet kórsetý múmkindigi týdy.