Shymkentte muǵalimder mektepte jóndeý jumystaryn júrgizgen – mınıstrlik

NUR-SULTAN. QazAqparat – Shymkent qalasyndaǵy №125 mektep muǵalimderi mektepte jóndeý jumystaryn júrgizip, mindetti tizbede joq qujattardy toltyrǵan. Bul týraly QazAqparat Bilim mınıstrligine silteme jasap habarlaıdy.

Shymkent qalasyndaǵy №125 jalpy orta bilim berý mektebinde muǵalimderden kelip túsken shaǵymdar boıynsha tekserý jumystary júrgizildi. Jospardan tys tekserý barysynda ótinishte kórsetilgen faktiler ishinara rastaldy.

«Tekserý barysynda mektep ákimshiligi tarapynan «Pedagog mártebesi týraly» QR Zań talaptary buzylǵany anyqtaldy. Sondaı-aq mektep muǵalimderi kásibı mindetterine jatpaıtyn jumys túrlerine tartylǵan. Máselen, 2019-2020 oqý jylynyń sońynda Shymkent qalasyndaǵy №125 mektep muǵalimderi mektepte jóndeý jumystaryn júrgizip, mindetti tizbede joq qujattardy toltyrǵan. Odan bólek, mektep ákimshiligi ustazdardy gazetter men jýrnaldarǵa jazylýǵa májbúrlegen», - delingen mınıstrlik habarlamasynda.

Bilim jáne ǵylym salasynda sapany qamtamasyz etý Komıtetiniń óńirlik departamenti júrgizgen jospardan tys tekserý qorytyndysy boıynsha №125 jalpy orta bilim berý mektebiniń laýazymdy tulǵalary zańnamanyń buzylýyna jol bergeni úshin ákimshilik jaýapqa tartyldy.