Shymkentte monopolısterge 100 mln teńgeden astam aıyppul salynǵan

ShYMKENT. QazAqparat – Shymkentte jyl basynan beri kelip túsken 212 aryz boıynsha júrgizilgen jospardan tys tekserýdiń nátıjesinde monopolısterge 100 mln teńgeden astam aıyppul salynǵan, dep habarlaıdy QazAqparat tilshisi.

Bul týraly aqparattyq-kommýnıkatsııa qyzmetinde ótken baspasóz brıfıngisinde QR UEM TMR komıtetiniń Shymkent qalasy boıynsha departamentiniń basshysy D. Qaıynberdıev atap ótti.

Departament basshysynyń sózinshe, qazirgi tańda QR Prezıdenti Qasym-Jomart Toqaevtyń Joldaýynda aıtylǵan tarıfter máselesimen júıeli ári naqty aınalysyp, tabıǵı monopolısterdiń taýarlary men kórsetetin qyzmetteri boıynsha baǵany retteý máseleleri boıynsha júıeli jumystar júrgizilýde. Monopolısterge salynǵan aıyppuldardyń qazirgi tańda 41,2 mln teńgesi óndirilgen.

«Zańnamany buzýshylyqtardy tez arada joıý týraly 35 nusqama shyǵarylyp, tutynýshylardan negizsiz alynǵan 286,6 mln teńge qaıtarylǵan. Máselen, gazben jabdyqtaý – 251,6 mln teńge, jylý energııasy boıynsha – 34,7 mln teńge, kirme joldar boıynsha – 331,5 myń teńge»,- deıdi D. Qaıynberdıev.

Departament basshysynyń aıtýynsha, monopolıster ótinimderi men esepterin elektrondy túrde tapsyrady. Bul «Tsıfrlyq Qazaqstan» baǵdarlamasyn iske asyra otyryp, sybaılas jemqorlyqtyń aldyn alýǵa baǵyttalǵan qadam.

Búginde departamentte 53-42-66 senim telefony iske qosylyp, jeke jáne zańdy tulǵalardyń aryzdary men usynystary úshin arnaıy jáshikter de ornatylǵan.