Shymkentte mıllıonnan astam qyzǵaldaq gúldedi
ShYMKENT. QazAqparat - Shymkent bıyl da qyzǵaldaqtar astanasyna aınaldy. Qaladaǵy gúlzarlarda jalpy sany 1 mıllıon 300 myńnan asa qyzǵaldaq gúldedi, dep habarlaıdy QazAqparat tilshisi.
Mamandardyń aıtýynsha, maýsymdyq gúlderdiń basym kópshiligi gollandyq suryptaǵy sary, qyzyl, kók, qyzǵylt jáne kúlgin tústi qyzǵaldaqtar. Qalany kóriktendirýshi mamandar olardy arnaıy keskinderdiń izimen ekken. Máselen, bazbiri ulttyq oıý-órnekterdi beınelese, endi biri qalanyń logotıpi men geometrııalyq keskin pishininde gúldep tur.
«Endi olar bir aıǵa jýyq ýaqyt boıy gúldep turady. Sodan keıin jazǵa qaraı olardyń ornyna basqa gúlder egiledi. Jazdyq gúlder kógaldardyń, sýburqaq keshenderi men qala kósheleriniń kórkin asha túspek», - deıdi mamandar.
