Shymkentte mereke kúni 114 turǵynǵa páter kilti tabystaldy
Sharada aımaq basshysy Janseıit Túımebaev oblysqa eńbegi sińgen birqatar azamattardy «Oblystyń Qurmetti azamaty» ataǵymen marapattady. «Nurly jol» baǵdarlamasy aıasynda salynǵan ákimshilik iskerlik ortalyǵyndaǵy kópqabatty úıden 114 turǵynǵa páter kiltterin tabystady. Osylaısha Ulystyń uly kúninde baspanaly bolǵan otbasylar qýanyshqa keneldi.
«Naýryz meıramy - tabıǵattyń tylsym qudireti kún men túnniń teńeser sátine tuspa-tus kelgenimen erekshelenedi. Naýryz - ejelden jańa men jaqsynyń, meıirim men shapaǵattyń, ádep pen ımandylyqtyń bastaýy bolyp otyrǵan. Bul kún - jańarý, jasarý kezeńi. Ulystyń uly kúni dál búgin otyzynshy ret toılanyp otyr. Bul - Táýelsizdigimizdiń, Memleket basshysynyń júrgizip otyrǵan saıasatynyń jemisi. Bizdiń qasıetti ońtústik jerine kóktem erte keledi. Sondyqtan da ońtústik jurty bul merekege erekshe yqylaspen daıyndalady. Ulystyń Uly kúninde, Qydyr daryǵan qadir tańynda tilegen armandarymyz oryndala bersin», - dedi Janseıit Qanseıituly.
Merekelik shara «Shattyq», «Aıgólek» bı ansamblderiniń "Kóktem Ońtústikten bastalady" atty horeografııalyq qoıylymymen jalǵasty. Sahnada kóktemge arnalyp "Aıtys" mýzykalyq nómiri kórsetildi. Ońtústik halqyn ulyq merekemen quttyqtap, elimizge belgili "Ulytaý", "Alashuly", "Órken" syndy ujymdar ánnen shashý shashty. Sh.Qaldaıaqov atyndaǵy oblystyq fılarmonııanyń Súgir atyndaǵy ult aspaptar orkestri men oblystyq opera jáne balet teatrynyń sımfonııalyq orkestri elge kóterińki kóńil-kúı syılady.
Al, keshkisin Naýryz merekesine arnalǵan saltanatty is-shara bastalady. Merekelik kontsert Qazaqstannyń estrada juldyzdarynyń óner kórsetýimen jalǵasady dep kútilýde. Shara sońy merekelik otshashýmen aıaqtalmaq.
