Shymkentte memqyzmetshilerdiń jumys sapasy baqylaýǵa alyndy

ASTANA. QazAqparat - Shymkentte 5 birdeı Halyqqa qyzmet kórsetý ortalyǵyna shaǵym jáshikteri ornatyldy, dep habarlaıdy QazAqparat qala ákimdiginiń baspasóz qyzmetine silteme jasap.

Bul jumysqa uıytqy bolǵan - Memlekettik qyzmet isteri jáne sybaılas jemqorlyqqa qarsy is-qımyl agenttiginiń OQO boıynsha departamenti men «Azamattarǵa arnalǵan úkimet» memlekettik korporatsııasynyń oblystyq fılıaly. Onyń maqsaty memlekettik qyzmetshilerdiń etıkasy men qyzmetterdiń sapasyn arttyrý bolyp tabylady.

Sondaı-aq Memlekettik qyzmet isteri jáne sybaılas jemqorlyqqa qarsy is-qımyl agenttiginiń qyzmetkeri  shahardaǵy HQO-larda aptasyna bir kún «Azamattardy qabyldaý» sharasyn ótkizetin bolady. Qyzmet alýshynyń quqyqtary buzylǵan jaǵdaıda aryz-shaǵymdardy qabyldap, keńes beredi. Shaǵym jáshikterine kelip túsken aryzdardy tıisti organdarǵa joldap, mán-jaıdy anyqtaýǵa kómektesedi.

Ázirge bul joba  tek Shymkenttegi ortalyqtarda iske asyrylýda.  Memlekettik qyzmetshiler tarapynan sapasyz qyzmet alǵan aýdandar men shalǵaıda jatqan eldi meken turǵyndary osynda kelip, aryzdana alady. Bul is tıimdiligin dáleldese, aýdan ortalyqtarynda osyndaı shaǵym jáshikterin ornalastyrý josparlanýda.