Shymkentte mektep oqýshylary ýlanyp qaldy

ShYMKENT. QazAqparat - Shymkentte mektep oqýshylary belgisiz ıisten ýlanyp qaldy. Sonyń saldarynan 37 oqýshy men 1 muǵalim jáne 1 eden jýýshy jedel járdem qyzmetimen aýrýhanaǵa jetkizilgen, dep habarlaıdy QazAqparat tilshisi.

Qalalyq bilim bólimi baspasóz qyzmetiniń málimetinshe, tótenshe jaǵdaı Yntymaq aqsham aýdanyndaǵy N54 mektepte bolǵan.

«Kúndizgi saǵat 16:53-ter shamasynda №54 mektepte 25 adam belgisiz ıisten ýlanyp qalǵan. Balalardyń basy aınalǵan. Oqý ornynda negizinen ekinshi aýysymdaǵy 4-7 synyp oqýshylary bolǵan. Oqıǵa ornyna TJD basshylyq quramy men «InterGazOrtalyqAzııa» mekemesiniń arnaıy brıgadasy, SES, «KazGıdroMedtsentr» mamandary keldi. Mektep ǵımaratynan 100-ge tarta ustaz ben tehnıkalyq qyzmetkerler, 877 oqýshy syrtqa shyǵarylyp, sabaq toqtatyldy. Jaýapty mamandar oqıǵa ornynda ıisti tekserip, ǵımaratty tolyqtaı qarap shyqqan. Nátıjesinde gazdyń nemese basqa da zattyń ıisi anyqtalmaǵan. Mamandar syrttaǵy aýada ıistiń bolýy múmkin degen qortyndy jasaǵan. Óıtkeni mekteptiń jylýy toqtatylǵan. Al, synyptardaǵy terezeler ashyq bolǵan» delingen habarlamada.

Qalalyq densaýlyq saqtaý basqarmasynyń málimetinshe toksıkologııalyq ortalyqqa barlyǵy 39 adam túsken. Olardyń ekeýi ǵana eresekter. Dárigerlik tekserýden keıin 34 oqýshy úıine qaıtarylǵan. Densaýlyǵyna shaǵymdanǵan oqýshylar aýrýhanaǵa áli de kelip jatyr. Qazir ıistiń qaıdan shyqqany jan-jaqty tekserilip jatyr.

Osy ýaqytta tótenshe jaǵdaı qyzmetiniń ókilderi úılerdi aralap, ıisten ýlanǵandar bar-joǵyn tekserip jatyr.