Shymkentte mektep oqýshylary kınologtardyń jumysymen tanysty
ShYMKENT. QazAqparat - Ońtústik Qazaqstan oblystyq ishki ister departamentiniń esirtkige qarsy kúres basqarmasynyń qyzmetkerleri Shymkent qalasynyń mektep oqýshylaryna arnap kınologııalyq qyzmet ortalyǵyna ekskýrsııa uıymdastyrdy. Balalarǵa qyzmettik polıtseı-ıtterdiń jattyǵýlaryn kórsetip, kınologtardyń jumysymen tanystyrdy, dep habarlaıdy QazAqparat tilshisi.
Atalǵan is-shara esirtkige qarsy kúres jáne jastar arasyndaǵy esirtki qylmystarynyń aldyn alý maqsatynda ótkizildi. Sondaı-aq, qylmyskerlerdi ustaýda jáne qylmysty ashýda ıtterdiń qyzmetin nasıhattaý boldy. Mektep oqýshylary qyzmettik ıtterdi ustaıtyn oryndardy aralap, olardyń tynys-tirshiligimen tanysty. Kınologtar men qyzmettik ıtter ózderiniń esirtki zatyn, jarylǵysh zattardy tabý, sondaı-aq, birneshe buıryqty oryndaý sekildi jumystardy qalaı atqaratynyn kórsetti.
Tártip saqshylary ekskýrsııa barysynda oqýshylarǵa kınologtar nemen aınalysatynyn jáne polıtsııada qyzmet atqaratyn ıtterdiń túrleri qandaı bolý kerektigin áńgimelep berdi. Polıtseıler tórtaıaqty kómekshilerdiń eń basty qarýy qylmysty ashýǵa ıis sezý jáne estý qabiletiniń myqty bolý kerektigin atap ótti.
Kezdesý sońynda mektep oqýshylary tártip saqshylaryna ózderi qyzyqtyrǵan suraqtaryn qoıyp, tushymdy jaýap aldy. Balalar ıtter qalaı qylmys ashqany men qylmyskerlerdiń izine túskenin erekshe qyzyǵýshylyqpen tyńdady.
