Shymkentte medıtsınalyq qaldyqtardy dalada órtegen kompanııa jaýapqa tartyldy

NUR-SULTAN. QazAqparat – Shymkent qalasynda medıtsınalyq qaldyqtardy dalada órteý faktisi boıynsha qylmystyq is qozǵaldy. Bul týraly QR Ekologııa, geologııa jáne tabıǵı resýrstar mınıstrliginiń baspasóz hatshysy Samal Ibraeva Facebook-tegi paraqshasynda jazdy, dep habarlaıdy QazAqparat tilshisi.

«Shymkent qalalyq Ekologııa departamenti ruqsat etilmegen jerde medıtsınalyq qaldyqtardy órteý faktisi boıynsha «Ekolaıf Astana» JShS-ǵa qatysty QR ekologııalyq zańnama talaptarynyń saqtalýyna jospardan tys tekserý júrgizdi. Tekserý nátıjesi boıynsha «Ekolaıf Astana» JShS burynǵy asfalt zaýyty men Jibek joly kóshesi 66/9 meken jaıdaǵy ónerkásip aımaǵy aýmaǵyndaǵy ashyq jerde medıtsınalyq qaldyqtardy ruqsatsyz órteý faktisi boıynsha QR Ákimshilik buzýshylyq kodeksiniń 328 jáne 332-baptary boıynsha ákimshilik jaýapkershilikke tartyldy», - dep jazdy ol.

Onyń atap ótýinshe, Túrkistan oblystyq Densaýlyq saqtaý basqarmasy men Shymkent qalalyq Densaýlyq saqtaý basqarmasyna «Ekolaıf Astana» JShS-niń memlekettik kelisimshart talaptaryn saqtaý mindettemesin oryndamaǵandyǵy týraly hat jiberilgen.

«Memlekettik satyp alýlar týraly zań talaptaryna sáıkes tapsyrys berýshi tarapynan Saryaǵash aýdany men Túrkistan qalasy boıynsha memlekettik kelisimshartty toqtatý týraly habarlama jiberildi. Buǵan qosa, atalǵan fakti boıynsha Shymkent qalasy Abaı aýdandyq ishki ister bólimi tarapynan qylmystyq is qozǵaldy», - dedi Samal Ibraeva.