Shymkentte medıtsına sheneýnikteri 52 mln teńgeni urlaý kúdigine ilindi

NUR-SULTAN. QazAqparat - Shymkent qalalyq densaýlyq saqtaý basqarmasynyń burynǵy basshysy men 1-qalalyq klınıkalyq aýrýhananyń bas dárigeri bıýdjet qarajatyn urlaý kúdigine ilindi. Bul týraly QR Sybaılas jemqorlyqqa qarsy is-qımyl agenttigi 1-shi departamenttiń aga tergeýshisi Qaısar Barjaqsynov aıtty, dep habarlaıdy QazAqparat tilshisi.

«Shymkent qalalyq sybaılas jemqorlyqqa qarsy qyzmet «Shymkent qalalyq densaýlyq saqtaý basqarmasy» MM-niń burynǵy basshysy men «№1 qalalyq klınıkalyq aýrýhanasy» ShJQ RMK-niń burynǵy bas dárigerine qatysty sotqa deıingi tergeýdi bastady», - dedi ol agenttiktiń baspasóz qyzmeti alańynda ótken brıfıng barysynda.

Onyń atap ótýinshe, kúdiktiler 2019 jyly S-synypty otorınolarıngolog dárigeriniń jumys ornyna arnalǵan jabdyqty qymbat baǵamen satyp alý arqyly 52 mln teńge kóleminde bıýdjet qarajatyn urlaý kúdigine ilinip otyr.

«Túpkilikti sheshimdi kúdiktiler kinásiniń dárejesin anyqtaı otyryp sot shyǵarady. QR Qylmystyq is júrgizý kodeksiniń 201-babyna sáıkes ózge aqparat tergeý múddesi úshin jarııalaýǵa jatpaıdy», - dedi Qaısar Barjaqsynov.