Shymkentte medıtsına mamandaryn tasymaldaý úshin arnaıy avtobýstar bólindi

ShYMKENT. QazAqparat – Elimizde qalyptasqan jaǵdaıǵa baılanysty 19 sáýirden bastap Shymkent qalasynda qoǵamdyq kólik qozǵalysy toqtatylǵan bolatyn. Osy jaǵdaıdy eskergen qala basshylyǵy medıtsına mamandaryn tasymaldaý úshin arnaıy avtobýstar bóldi, dep habarlaıdy QazAqparat tilshisi.

Qala ákiminiń orynbasary Maqsut Isahovtyń aıtýynsha, medıtsınalyq mekeme qyzmetkerlerin arnaıy 106 avtobýs tasymaldaıdy.

«Qoǵamdyq avtobýstar tikeleı indettiń taralý oshaǵy bolýy ábden múmkin. Oǵan qosa sarapshylardyń pikiri de eskerildi. Sondyqtan osyndaı qadamǵa amalsyzdan bardyq. Al, qaladaǵy 21 iri óndiris ornynyń qyzmetkerleri 90 avtobýspen jumysyna qatynaıdy», - dedi qala ákiminiń orynbasary Maqsut Isahov.

Qala ákiminiń orynbasary sondaı-aq, arnaıy tirkelgen 11 taksı kompanııasy jumysyn jalǵastyra beretinin atap ótti. Alaıda taksıde eki adamnan artyq jolaýshy alýǵa bolmaıtyny eskertildi.

Bastysy, tasymaldaýshy kompanııa basshylaryna baǵany qıyn-qystaý kúnderi kótermeý boıynsha usynys aıtyldy. Al turǵyndarǵa tirkelmesten jolaýshy tasymaldaýǵa tyıym salynyp otyr.