Shymkentte Májilis depýtattary «Qutty meken» jobasynyń iske asyrylý barysyn tekserdi

ShYMKENT. QazAqparat - QR Parlamenti Májilisiniń depýtattary, «Nur Otan» partııasy fraktsııa músheleri Darhan Myńbaı, Ábdimanap Bekturǵanov, Sáken Qanybekov, Ýálıhan Qaınazarov jáne Fahrıddın Qarataevtar jumys saparymen Shymkentke keldi. Saılaýshylarmen kezdesken halyq qalaýlylary birqatar áleýmettik nysandardy aralap kórdi, dep habarlaıdy QazAqparat tilshisi.

Halyq qalaýlylarynyń shymshaharǵa kelýdegi maqsaty - Tuńǵysh Prezıdent, Elbasy Nursultan Nazarbaevtyń tabysy az jáne kópbalaly otbasylardy qoldaýǵa baǵyttalǵan áleýmettik bastamalaryn júzege asyrý barysymen tanysý. Búgin Májilis depýtattary «Qutty meken» ulttyq jobasy aıasynda Badam ózeninde salynyp jatqan kópirdiń jumysymen tanysty. Ótkel Qonaev gúlzarynyń jalǵasy retinde júzege asyp jatyr. Onyń júzege asýy 7 kezeńnen turady. Qazirgi tańda 3-shi kezeńniń jumystary atqarylýda. Qalǵan kezeńder boıynsha jobalaý jumystary jalǵasýda. Qalǵan jumystardyń qurylysyna 4 042 297 teńge bólý týraly usynys respýblıkalyq bıýdjetke joldanǵan.

«Bul obekt qala úshin ǵana emes, el úshin de óte mańyzdy. Óıtkeni kópir eki úlken megapolıs - Shymkent pen Tashkentti baılanystyryp, eki el arasyndaǵy yntymaqtastyq úshin qolaıly jaǵdaı jasaıdy. Sondyqtan, barlyq máseleler tez arada sheshilip, nysan merziminde paıdalanýǵa beriledi degen senimdemiz», - dep atap ótti top jetekshisi Darhan Myńbaı.

QR Májilis depýtattary bul kúni sondaı-aq, «Sáýle» móltekaýdanyndaǵy №76 mektepte boldy. Qazirgi tańda bilim uıasynyń janynan qosymsha 300 oryndyq oqý ǵımaraty, sport zaly, sheberhana men ashana ǵımarattary boı kóterýde. Jańa ǵımaratty paıdalanýǵa berý ýaqyty 2019 jyldyń 25 mamyry dep josparlanǵan. Halyq qalaýlylary bilim oshaǵynyń ujymymen kezdesip, jańa ǵımarattyń qurylys jumystarymen tanysty.

Depýtattar sapary barysynda óndiristik alańdar men aýylsharýashylyq qojalyqtarynda eńbek ujymdarymen kezdesip, azamattarǵa qabyldaý ótkizedi dep kútilýde.