Shymkentte mas júrgizýshi polıtseıdi kóligimen súırep, bir adamnyń aıaǵyn basyp ketti

ShYMKENT. QazAqparat - Shymkentte júrgizýshi ýchaskelik ınspektordy kapotynda súırep, kóligimen jaıaý júrginshiniń aıaǵyn basyp ketti, dep habarlaıdy Polisia.kz.

30 naýryzda keshki saǵat 18.30 shamasynda turǵyn úıdiń aýlasynda kórneki belgileri boıynsha mas bolǵan er adam aýla sypyrýshylardyń jumysyna narazylyq bildirip, bylapyt sóılep, balaǵattap, ar-namysyna tıetin sózder aıtqan. Oqıǵa ornyna kelgen ýchaskelik ınspektor Erhan Abdýraımov er adamnyń qujattaryn kórsetýin talap etip, ál-Farabı aýdany polıtsııa basqarmasynyń №25 tirek pýnktine birge barýyn surady.

Alaıda, er adam polıtsııa qyzmetkeriniń zańdy talaptaryna baǵynbaı, kólikke otyryp, jasyrynyp ketkisi keldi. Ony toqtatý jáne avtokólikti basqarýǵa jol bermeý maqsatynda polıtsııa qyzmetkeri kapotyna sekirip, 800 metrden astam jol júrgennen soń, qaıta tústi. Ary qaraı júrgizýshi birneshe metr júrip, joldan ótip jatqan úlken jastaǵy jaıaý júrginshiniń aıaǵyn basyp ketti.

Patrýl polıtsııa qyzmetkerleri jedel is-áreket barysynda júrgizýshini anyqtap, ustady. Ol Jambyl oblysynyń 54 jastaǵy turǵyny bolyp shyqty. Júrgizýshi ýaqytsha ustaý ızolıatoryna qamaldy. Kólik aıyp turaǵyna salyndy.

Atalǵan jaıt QR Qylmystyq kodeksiniń 380-baby (bılik ókiline qatysty kúsh qoldaný) boıynsha sotqa deıingi tergeýdiń biryńǵaı tiziliminde tirkelgen. Jaıaý júrginshi medıtsınalyq mekemege jetkizildi. Tıisti saraptamalar taǵaıyndaldy.