Shymkentte mas júrgizýshi 5 kólikti soqty
ShYMKENT. QazAqparat - Shymkentte Nıssan kóliginiń júrgizýshisi joldaǵy 5 kólikti soqqan. Nátıjesinde 7 adam túrli dene jaraqatyn alyp, aýrýhanaǵa jetkizildi, dep habarlaıdy QazAqparat tilshisi.
Oblystyq ishki ister departamentiniń baspasóz qyzmetiniń jetekshisi Saltanat Qarakózova taratqan málimetterge qaraǵanda, jol kólik oqıǵasy Temirlan tas jolynda bolǵan. Baǵdarshamdy kútip turǵan bes kóliktiń artynan Nıssan kóligi soqtyǵysqan. Nátıjesinde qatty soqqydan Nıssan kóligi qarsy baǵytqa shyǵyp ketipti. Jaraqat alǵandarǵa jedel járdem qyzmeti shaqyrtyldy. Aýrýhanaǵa jetkizilgenderdiń ishinde balalar da bar.
Oqıǵa ornyna kelgen polıtseıler jol apatyn jasaǵan júrgizýshiniń ishimdik iship alǵanyn anyqtaǵan. Qazirgi tańda onyń ústinen ákimshilik hattama toltyrylyp, tergeý jumystary júrip jatyr. Kólik aıypturaqqa qoıyldy.
