Shymkentte mańyzdy kópir paıdalanýǵa berildi
Óńir basshysy saltanatty sharaǵa qatysýshylardy temir jol ústinen ótetin ótkeldiń qaıta qurý jumystarynyń aıaqtalýymen quttyqtap, jańa nysannyń el ıgiligine qyzmet etýine tilektestik bildirdi.
«Elbasynyń tapsyrmasyna sáıkes, Shymkent elimizdiń úshinshi megapolısine aınalýda. Al megapolıs uǵymy halyq sanynyń artýymen ólshenbeıtini belgili. Osy dárejege laıyqty bolý úshin barlyq salada ósý jáne damý joǵary qarqyn alýy qajet. Qalanyń osy talaptarǵa saı bolý baǵytynda birqatar jumystar atqaryp kelemiz. Sonyń bir dáleli - búgingi paıdalanýǵa berilgen kópir. Bul - turǵyndardyń qaýipsizdigi men ómir súrýine yńǵaıly jaǵdaı jasaýdyń kórinisi. Aldaǵy ýaqytta jol keptelisiniń aldyn alý maqsatynda shahardaǵy birneshe jerden jolaıryqtar salý ekonomıkalyq-áleýmettik damý josparyna engizildi», - dedi J.Túımebaev.
Aıta ketý kerek, toǵyz joldyń torabynda ornalasqan kópir 1960 jyly salynǵan bolatyn. Bastapqyda eni 9 metr bolǵan júris bóligi qaıta qurý jumystarynan soń 21 metrge deıin keńeıdi. Sondaı-aq, kópirdiń jaryqtandyrý jumystary júrgizilip, apatty jaǵdaıy joıyldy. Nátıjesinde, Tóle bı, Qapal batyr, Aqnazar han, Anarov kóshelerinde kólik tyǵyndary azaıdy.
Nysan jumystaryna «Korporatsııa Bereke A» JShS merdigerlik etse, tehnıkalyq qadaǵalaýshy bolyp «ErGarantStroı» JShS, al jobalaýshy mekeme retinde «Almaty Joba» JShS mekemesi qurylys jumystaryn júrgizdi. Qaıta qurý kezinde 100-den astam adam turaqty jumyspen qamtyldy.
Jalpy, oblys boıynsha jyl basynan beri uzyndyǵy 800 shaqyrym bolatyn oblystyq mańyzy bar jalpy paıdalanymdaǵy avtomobıl joldary jáne eldi meken kóshelerine kúrdeli jáne orta jóndeý jumystary júrgizilýde. Salaǵa jaýapty mamandardyń aıtýynsha, joǵaryda atalǵan barlyq kópirler men 664,7 shaqyrym jol (282 nysan) jyl sońyna deıin paıdalanýǵa beriledi dep kútilýde. Onyń ishinde, 17 kópir de bar.
FOTO: Maqsat Shaǵyrbaev
