Shymkentte MÁMS júıesin túsindirý sharalary jalǵasýda
Qaladaǵy densaýlyq saqtaý salasyndaǵy jańa ózgerister men medıtsınalyq saqtandyrý júıesine daıyndyq barysy aqparattyq-kommýnıkatsııalyq ortalyǵynda ótken baspasóz brıfınginde sóz boldy, dep habarlaıdy QazAqparat tilshisi.
Baspasóz máslıhatyna QR Densaýlyq saqtaý vıtse-mınıstri Kamaljan Nadyrov pen Shymkent qalalyq densaýlyq saqtaý basqarmasynyń basshysy Ashan Baıdývalıev, medıtsına ǵylymynyń doktory, professor Quralbaı Quraqbaev qatysty.
Brıfıngte sóz sóılegen Kamaljan Nadyrov el turǵyndarynyń densaýlyǵyn jaqsartý, ıaǵnı mindetti áleýmettik medıtsınalyq saqtandyrý jaıy basty nazarda ekenin atap ótti. Bul salaǵa bólinip jatqan qarajat 42 mlrd teńgeden 60 mlrd teńgege deıin óskenin atap ótti.
Onyń sózinshe, qalada mindetti áleýmettik medıtsınalyq saqtandyrý júıesi boıynsha 667 688 azamat qamtylǵan. Qala aýmaǵynda ornalasqan 18 iri kásiporynnyń bazasynda emhanada bekitilgen kestege sáıkes MÁMS aqparattyq-túsindirý jumystary júrgizilgen. Osy oraıda jyl basynan beri tirkeýde turǵan, biraq statýsy joq 28 myń adam naqtylanǵan. Onyń ishinde 13 myń adamnyń arnaıy dárejesi anyqtalyp, qazir qalǵan 15 myń azamatty statýsyna saı qaıta tirkeýge alý jumystary jalǵasýda.
«Aldymyzda turǵan basty maqsat – azamattarǵa sapaly qyzmet kórsetý. Qańtar aıynan bastap mindetti áleýmettik saqtandyrý júıesi engiziletini belgili. Osy baǵytta densaýlyq saqtaý basqarmasynda baǵyttar aıqyndalyp, júıeli jumys júrgizilýde. Qalamyzdyń aýrýhanalaryna taǵy qosymsha jańa 3-4 kompıýterlik tomografııa apparatyn alǵaly otyrmyz», - dedi basqarma basshysy A.Baıdývalıev.
Brıfıngte sonymen qatar, qalanyń Kásipkerlik jáne ındýstrıaldy-ınnovatsııalyq damý basqarmasynyń málimetinshe, bekitilgen jospar boıynsha 375 kásiporyn men 35 bazar jáne 10 saýda ortalyǵynda túsindirý jumystary júrgizilgen.