Shymkentte mamandandyrylǵan halyqqa qyzmet kórsetý ortalyǵy ashyldy
ASTANA. QazAqparat - Jańa jyl merekesi qarsańynda oblys ákimi Janseıit Túımebaevtyń qatysýymen Shymkentte mamandandyrylǵan halyqqa qyzmet kórsetý ortalyǵy ashyldy. Bir táýlikte 600 adamnyń qujatyn rásimdep bere alatyn ortalyqta 120 adam qyzmet etedi. Endi turǵyndar avtokólik quraldaryn tirkeý jáne júrgizýshi kýáligin alýǵa qatysty barlyq memlekettik qyzmetterdi bir mezette bir keshennen ala alady, dep habarlaıdy oblystyq ákimdiktiń baspasóz qyzmeti.
Mamandandyrylǵan HQKO-da teorııalyq jáne tájirıbelik emtıhandardy tapsyrý protsesterin avtomattandyrý adamı faktorlardy tolyqtaı joıyp, ony barynsha aıqyn etýge múmkindik beredi. Munda azamattardyń ýaqyty únemdelip, bar-joǵy eki saǵattyń ishinde aýqymdy jumystardy júzege asyrýǵa bolady.
Ortalyqtyń qyzmetimen tanysqan óńir basshysy Janseıit Qanseıituly: «Ońtústik Qazaqstanda 500 myńǵa tarta avtokólik bar. Bıylǵy 11 aıdyń ózinde 52 myńǵa tarta adam júrgizýshi kýáligin alǵan. Osyndaı úlken kólemdegi jumysty jeńildetip, júıelendirý úshin ashylǵan Mamandandyrylǵan halyqqa qyzmet kórsetý ortalyǵy qyzmet túrlerin jyldam ári yńǵaıly ýaqytta rásimdep alýǵa múmkindik beredi»,-dedi.
Elektrondy baqylaý júıesi qosylǵan HQKO tolyq avtomattandyrylǵan. Munda júrgizýshi kýáligin alý úshin arnaıy medıtsınalyq tekserýden ótýge bolady. Kýálik alýǵa yntalylar synaqty osy jerden tapsyrady. A, A1, V, V1, S, S1, D, D1 kategorııalary úshin kólik júrgizýdegi tájirıbelik emtıhandy tapsyrýǵa 3 jeńil avtokólik, júk kóligi, 2 avtobýs jáne 2 mototsıkl bólingen. Synaq nátıjesin tehnıka baqylap baǵalaıdy.
Oblysta búgin budan ózge bir mezette birneshe jańa HQKO iske qosyldy.
Saıram aýdanynyń Qarasý aýyly, Rahımov kóshesi, 1079 mekenjaıynda ornalasqan mamandandyrylǵan HQKO sektorynda avtoáýesqoılar óz kólikterin tek qaıta tirkeýlerine bolady.
254 myńnan asa turǵyny bar Enbekshi aýdanynda № 8-HQKO ashyldy. Munda halyqqa memlekttik qyzmettiń 530 túri kórsetiledi. Onyń 315-i elektrondy, 215-i dástúrli memlekettik qyzmetter túrleri bolsa, 53-i qosymsha josparlanǵan pılottyq qyzmetter. Búginde bul mekemede 25 qyzmetker jumys isteıdi.
Tólebı aýdanynda ashylǵan halyqqa qyzmet kórsetý ortalyǵy Leńgir qalasy, Qapal batyr kóshesi, 20 mekenjaıynda ornalasqan jáne 600 sh.m. jerdi alyp jatyr. Bul respýblıka boıynsha memlekettik-jekeshelik áriptestik aıasynda ashylǵan, bıýdjettik qarajatqa emes, jeke kásipkerdiń qarajatyna salynǵan alǵashqy HQKO. Memlekettik-jekeshelik áriptestik jalǵa tólenetin qarajatty qarastyrmaıdy, bul degenińiz «Azamattarǵa arnalǵan úkimet» memlekettik korporatsııasy tek kommýnaldyq tólemderdi júzege asyratyn bolady.
Aıta keteıik, HQKO-lar aptanyń alty kúninde, jeksenbiden basqa kúnderi saǵat 9.00-den 20.00-ge deıin úzilissiz jumys isteıdi.
