Shymkentte mal qora órtenip, bir adam kúıip qaldy

ShYMKENT. QazAqparat - Shymkentte sharýashylyq qurylys nysanynan órt shyǵyp, bir adam kúıip qaldy. Tótenshe jaǵdaı Jıdeli móltekaýdanyndaǵy eki qabatty qorada oryn alǵan, dep habarlaıdy QazAqparat.

Órt týraly aqparat qalalyq tótenshe jaǵdaılar qyzmetine keshe túngi saǵat 23.27-de túsken. Jalyn jalpy kólemi 70 sharshy metr aýmaqty sharpyǵan. Nátıjesinde 3,5 tonna shóp pen 7 iri qara mal janyp ketti. Denesin kúıik shalǵan 43 jastaǵy er azamat aýrýhanaǵa jetkizildi. 

«Órtti sóndirýge jeke quramnyń 20 qyzmetkeri men 5 tehnıkasy jumyldyryldy. Jalyn saǵat 00.25-te aýyzdyqtalyp, saǵat 01.54-te tolyq sóndirildi. Qazirgi tańda órttiń shyǵý sebepteri anyqtalýda» delingen Shymkent qalalyq TJD baspasóz qyzmeti taratqan habarlamada.