Shymkentte «Laıyqty urpaq tárbıeleıik!» atty is-shara ótti
ShYMKENT. QazAqparat - Shymkent qalasyndaǵy № 43 jalpa orta mektebinde «Laıyqty urpaq tárbıeleıik!» atty is-shara bolyp ótti, dep habarlaıdy qala ákimdiginiń baspasóz qyzmeti.
Atalmysh jıyn oblystyq prokýratýra men Dene shynyqtyrý jáne sport basqarmasynyń birlesken jobasy aıasynda júzege asýda.
Táýelsizdiktiń 25 jyldyǵyna oraı ótken is-sharada ózekti máseleler de kóterildi. Patrıottyq rýhy bıik 100-den astam oqýshy «Otan - ottan ystyq», - dep, el, jer týraly ánderin shyrqady. Sondaı-aq, oblystyq narkalogııalyq dıspanserdiń dárigerleri, oblystyq salaýatty ómir saltyn qalyptastyrý ortalyǵynyń mamandary jáne de ýchaskelik ınspektorlardyń qatysýymen túsindirme jumystary júrgizildi. Kún tártibindegi ózekti másele boıynsha ýchaskelik ınspektor qazirgi tańda jasóspirimderge qatysty jasalatyn qylmystar men olardyń arasynda kezdesetin keleńsiz jaǵdaılarǵa toqtaldy.
Al, oblystyq narkodıspanser mamandary psıhotropty zattardyń adam ómirine qaýipti ekenin aıtyp, túsindirme jumystaryn júrgizdi. Usaq quqyqbuzýshylyq jasaǵan jasóspirimderge ýaqtyly kómek kórsetý aýyr qylmystardyń aldyn alý bolyp tabylady. Aıta ketý kerek, keıingi kezderi jastar arasyndaǵy quqyqbuzýshylyq kún tártibinen túspeı tur. Mamandar tarapynan jasalyp jatqan jumystar da az emes. Kóbinese, oqý oryndaryna baryp túsindirý jumystaryn júrgizý óz nátıjesin berýde deıdi mamandar.
