Shymkentte qyzmettik kólikterdi jeke maqsatta paıdalanǵandar ustaldy
ShYMKENT. QazAqparat - Shymkentte qyzmettik kólikter jeke maqsatta paıdalanylyp júrgen. Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttiginiń Shymkent qalasy boıynsha departamenti men polıtseıler birlese júrgizgen reıd barysynda anyqtalǵan, dep habarlaıdy QazAqparat tilshisi.
Atalǵan departamenttiń málimetinshe, Túrkistan oblysynyń bilim basqarmasy basshysyna tıesili kóliktiń júrgizýshisi ruqsatsyz minip júrgeni anyqtaldy.
«12 qazan kúni saǵat 22:34-te Erimbetov kóshesiniń boıynda memlekettik tirkeý nómiri 107 AV /13 Toyota camry qyzmettik avtokóliginiń qujattaryn qaraý barysynda júrgizýshiniń joldama paraǵynda onyń medıtsınalyq tekserýden ótkendigi jaıly belgi men avtokóliktiń garajdan shyǵý jáne kirý merzimderi kórsetilmegen. Dál osyndaı jaǵdaı Túrkistan oblysynyń ekonomıka basqarmasyna tıesili qyzmettik avtokólikti toqtatý barysynda da anyqtaldy. ıAǵnı, atalǵan avtokólikter onyń júrgizýshileriniń óz qalaýy boıynsha merzimsiz basqarýda bolǵan», - deıdi Memlekettik qyzmet isteri jáne sybaılas jemqorlyqqa qarsy is-qımyl agenttiginiń Shymkent qalasy boıynsha departamentiniń bas mamany E.Seıdalıev.
Sonymen qatar, reıd barysynda túngi saǵat 21:16-da qalalyq áýejaıdyń avtoturaǵynda Túrkistan oblysy ákiminiń apparatyna tıesili kóliktiń qujattary tekserilgen. Memlekettik tirkeý nómiri H 088 OK Toyota corolla júrgizýshisi E.Nýrmanov jumystan tys ýaqytta qyzmettik avtokólikti jeke maqsatqa paıdalanyp júrgeni anyqtaldy. Barlyq júrgizýshiler tıisti túsinikteme berýden bas tartqan.
«Avtokólikterge jaýapty bolyp bekitilgen memlekettik mekemeniń birinshi basshylary tarapynan memlekettik múlikti tıimdi jáne tek qyzmettik maqsatqa paıdalanýǵa jáne qujattardyń tolyq rásimdelýine tıisti baqylaý bolmaǵan. Anyqtalǵan zańbuzýshylyqtardyń aldyn alý jáne laýazymdy tulǵalardyń tártiptik jaýapkershilin qaraý úshin Túrkistan oblysy ákiminiń apparatyna hat joldandy» delingen habarlamada.
