Shymkentte qyzmet barysynda qaza tapqan polıtseılerge eskertkish ornatyldy
ShYMKENT. QazAqparat - Shymkentte Qazaqstan polıtsııasynyń 26 jyldyǵyna baılanysty qyzmet barysynda qaza tapqan polıtseılerge eskertkish ornatyldy. Saltanatty sharaǵa Túrkistan oblysynyń ákimi Janseıit Túımebaev pen qala ákimi Ǵabıdolla Ábdirahymov, mılıtsııa general-maıory Jeńisbaı Sultanov pen ózge de sala ardagerleri qatysty, dep habarlaıdy QazAqparat tilshisi.
Eskertkishtiń ashylý rásiminde alǵashqy bolyp sóz alǵan oblys basshysy Janseıit Túımebaev atalǵan eskertkish azamattardyń qaýipsizdigin qorǵaý maqsatynda óz ómirlerin qıǵan polıtseılerdiń rýhyna arnalǵanyn jáne olardyń otbasy múshelerine óz tarapynan úlken alǵys aıtatynyn jetkizdi. Sondaı-aq qyzmettik boryshyn óteýde qaza bolǵan tártip saqshylaryn únsizdikpen eske alyp, gúl shoqtary qoıyldy.
«Qoǵamdyq tártipti qalyptastyrý, el tynyshtyǵyn qorǵaý jolyndaǵy qajyrly eńbekterin eskere otyryp, qaza tapqandardyń qurmetine oraı eskertkish qoıýdy jón kórdik. Búgingi urpaqqa ulaǵat, bolashaqqa amanat etýdi maqsat etken bul nysan ótkenge taǵzym bolary sózsiz. Árıne erlikpen qaza tapqan batyrlarymyzdy eshbir eskertkishpen almastyra almaımyz. Eldiń tynyshtyǵy jolynda janyn qurban etken erjúrek, batyl erler eshqashan el jadynan shyqpaıdy. Qurmetti polıtsııa qyzmetkerleri! Árqashan anttaryńyzǵa adal bolyp, el qorǵany degen ataqqa abyroıly qyzmet ete berińizder! Elimiz tynysh, halqymyz aman, táýelsizdigimiz tuǵyrly bolsyn!», - dedi oblys ákimi.
Saltanatty sharada qyzmettik boryshyn óteýde qaza bolǵan tártip saqshylaryn bir sát únsizdikpen eske alynyp, eskertkishke gúl shoqtary qoıyldy. Al oblystyq ІІD bastyǵy polıtsııa polkovnıgi Qaırat Dálbekov atalǵan eskertkishtiń mán mańyzyna toqtalyp, polıtsııa qyzmetkerlerin quttyqtady.
«Táýelsizdik alǵan jyldarda elimizde qyzmettik boryshyn atqarý kezinde 709 polıtsııa qyzmetkeri ómirden ótken. Onyń ishinde 23-i - ońtústikqazaqstandyq saqshylar. Bizdiń qyzmetimiz aýyr qatersiz bolmaıdy. Búgin biz ómiriniń sońǵy sátine deıin qyzmetine adal bolyp qalǵan áriptesterimizdi eske alamyz. Biz óziniń ómirin zańnyń durys oryndalýy, beıbitshilik pen tynyshtyq ornaý úshin qıǵan jandardy máńgilik este saqtaýymyz qajet. Olardyń erlikterin jáne tabandylyqtaryn úlgi ete otyryp, birneshe býyn polıtsııa qyzmetkerleri tárbıelenetin bolady. Qyzmet barysynda qaza tapqan áriptesterimizge bizdiń tarapymyzdan qashanda laıyqty qurmet kórsetilip keledi. Olardyń esimi polıtsııa tarıhynda altyn áriptermen jazylyp qalady», - dedi Qaırat Dálbekov.
Óz kezeginde oblystyq Іshki ister departamentiniń jeke apparat quramy saltanatty sherýmen júrip ótti. Sondaı-aq, sharaǵa qatysýshylar ІІD mýzeıin tamashalady. «Qoǵamdyq kelisim» mekemesiniń ǵımaratynda polıtsııa salasynda arnalǵan foto kórme uıymdastyryldy. Úzdik polıtsııa qyzmetkerleri marapattalyp, shara sońy merekelik kontsertke ulasty.
