Shymkentte qysqa daıyndyq jumystary pysyqtalyp jatyr
ShYMKENT. QazAqparat - Shymkentte qysqa daıyndyq jumystary pysyqtalyp jatyr. Shahardaǵy 1811 kópqabatty turǵyn úıdiń 1052-si ortalyqtandyrylǵan jylý júıesine qosylǵan. Aldaǵy jylý maýsymynda atalmysh úılerge 13 servıstik mekeme qyzmet kórsetedi, dep habarlaıdy QazAqparat HAA tilshisi.
Qalanyń qysqy jylý maýsymyna daıyndyǵy qala ákimi Ǵabıdolla Ábdirahymovtyń tóraǵalyǵymen ótken jıynda qaraldy.
Mamandardyń sózinshe, jeke avtonomdy qazandyǵy bar páterlerdi ortalyqtandyrylǵan júıege qosý, syǵymdaý jumystaryn júıeli ári der merzimde aıaqtaý basty nazarǵa alynyp otyr. Qazirgi tańda, 759 turǵyn úıde qysqy daıyndyq jumystary páter ıeleriniń óz kúshterimen júrgizilýde.
Qalalyq turǵyn úı-kommýnaldyq sharýashylyq bóliminiń basshysy Nurlan Bektursynovtyń aıtýynsha, bıyl qalanyń bıýdjettik nysandary qyrkúıek aıynda tolyǵymen jylý qabyldaýǵa ázir bolmaq. Qala aýmaǵynda búginde 352 bıýdjettik nysan, onyń ishinde, 223 bilim, 78 densaýlyq saqtaý, 6 sport, 42 mádenıet jáne 3 áleýmettik nysan bar. Qazir ondaǵy ǵımarattardyń 33 paıyzynda syǵymdaý jumystary tolyǵymen aıaqtaldy. Jylýdy avtonomdy qazandyqtar arqyly alatyn 172 bıýdjettik mekeme úshin 5058 tonna kómir, 353 myń lıtr suıyq otynnyń qajettigi anyqtalǵan. Bul qajettiliktiń 53 paıyzy tıisti oryndarǵa jetkizilgen.
«Bıyl «Nurly jol» baǵdarlamasy sheńberinde Baıtursynov kóshesi boıyndaǵy 5,2 shaqyrymdyq magıstraldyq jylý qubyry aýystyrylýda. Sondaı-aq, «3-Energoortalyq» AQ-nyń balansyndaǵy qalanyń soltústik bóligindegi jylý qubyrlary kommýnaldyq menshikke qabyldandy. Ondaǵy júıelerdiń 80 paıyzynda tozyǵy jetkeni eskerilip, birqatar qaıta qurý jumystary qolǵa alyndy. ıAǵnı, bıyl jalpy uzyndyǵy 40 shaqyrymdyq ishki oramdyq jylý júıelerinde aǵymdaǵy jóndeý jumystary júrgizilýde. Bekitilgen jumystar arnaıy keste aıasynda júzege asyrylady»,- deıdi Nurlan Qarabalauly.
Al, «Shymkent qalasynyń 2020 jylǵa deıingi áleýmettik-ekonomıkalyq damý tujyrymdamasynda» kórsetilgendeı, qala halqy bul baǵyttaǵy aýqymdy jumystardyń ıgiligin endi birer jylda tolyǵymen sezinýi tıis. Qazirgi tańda, jylý júıelerin qaıta qurý boıynsha naqty is-sharalar jospary túzilgen. Sondaı-aq, mamandar búginde tabıǵı gazben qamtylǵan qala halqynyń úlesi 92 paıyzǵa ulǵaıǵanyn aıtady. Bıyl «Bozaryq-1, 2, 3», «Yntymaq-2», «Jańa Turlan» jáne «Turan» shaǵyna ýdandaryndaǵy 4194 turǵyn úıge tabıǵı gaz júıesi jetkizilmekshi.
