Shymkentte Qyrǵyzstan jastaryna sot júıesindegi jańalyqtar tanystyryldy

ShYMKENT. QazAqparat – Shymkent qalasy Qarataý aýdandyq sotynyń tóraǵasy E.Rahmanberdi Shymkent ýnıversıtetine tájirıbe almasý úshin kelgen Qyrǵyzstan Respýblıkasynyń «Quqyqtaný» mamandyǵynyń stýdentterimen kezdesti, dep habarlaıdy QazAqparat tilshisi.

Kezdesýde sot tóraǵasy Qazaqstan Respýblıkasy Joǵarǵy soty tóraǵasynyń «7 túıin» baǵdarlamasynda kózdelgen sot júıesine qoıylǵan mindetter men maqsattardyń sottarda júzege asyrylý jaǵdaıyna toqtalyp ótti. Jańa júıedegi talap qoıý aryzdaryn elektrondy túrde berý men sot aktilerin elektrondy túrde alý, kez kelgen jerden sot májilisine smartfon arqyly qatysý, sot isteriniń ótý kestesimen elektrondy túrde tanysý jáne basqa da jańa tehnologııalar múmkindikterin atap ótti. Kezdesýge kelgen jastar qoldanystaǵy sot júıesiniń zamanaýı jumys formatymen tanysyp, jańa elektrondyq servıster týraly aqparat aldy. Olar sot májilisi zalynda bolyp, «Vırtýaldy sot» protsesiniń ótkizilýin qarady. «Sot kabıneti» servısterinde, «Sot aktileriniń derekqory» portalynda jumys isteý barysymen tanysty. Óz kezeginde, Qyrǵyzstan Respýblıkasynyń stýdentteri sot tóraǵasyna Qazaqstan Respýblıkasyndaǵy sot júıesiniń jumysyna jáne sot júıesindegi jańa ózgeristerge qatysty kóptegen suraqtar qoıyp, ózara pikir almasty. Sonymen qatar, sot tóraǵasynyń tóraǵalyq etýimen ótkizilgen qylmystyq is boıynsha sot otyrysyna qatysty. Іs-sharaǵa qatysýshylar sot tóraǵasyna alǵysyn aıtyp, kezdesýdiń qyzyqty ári áserli bolǵanyn jetkizdi.