Shymkentte qylmystyq top otyzǵa tarta adamnan 100 mln teńgeni aldap alyp ketken

ShYMKENT. QazAqparat - Shymkentte qylmystyq top músheleri otyzǵa tarta adamdy aldap, 100 mln teńgelerin alǵan. Aldyn ala sóz baılasqan adamdar toby turǵyndarǵa memlekettik baǵdarlama boıynsha qaıtarymsyz grant aqsha men tómen paıyzben nesıe alyp beremiz dep sendirgen, dep habarlaıdy QazAqparat tilshisi.

Qalalyq polıtsııa departamentine jábirlenýshi dep tanylǵan 30 shaqty adam aryzdanǵan. Olar alaıaqtardyń arbaýyna túsip, ár baǵyttaǵy qyzmetteri úshin 100 myń teńge men 750 myń teńge aralyǵynda aqsha bergenin aıtqan. Osylaısha jábirlenýshilerge keltirilgen shyǵyn kólemi shamamen 100 mln teńgeni quraǵan. Tártip saqshylary jan-jaqty jedel-izdestirý jumystaryn júrgizý barysynda 6 adamnan qurylǵan top músheleriniń tulǵasyn anyqtady.

«Qazirgi tańda kúdiktilerge qatysty QR QQ-niń 190-babymen (Alaıaqtyq) qylmystyq is qozǵaldy. 4 kúdikti ustalyp, olarǵa qatysty «kúzetpen ustaý» túrindegi bultartpaý sharalary qoldanylǵan. Al, bir sezikti Nur-Sultan qalasynyń sotymen 3 jyl 6 aıǵa sotty bolyp, bas bostandyǵynan aıyrý oryndarynda jazasyn óteýde. Taǵy bir aıyp taǵylǵan kúdikti tulǵaǵa Ál-Farabı aýdandyq sotynan boı tasalaýyna baılanysty memleketaralyq izdeý jarııalanǵan» delingen qalalyq PD baspasóz qyzmeti taratqan habarlamada.