Shymkentte kúshti jel birqatar nysannyń shatyryn julyp áketip, kólikterdi zaqymdady
Bul týraly QazAqparat Shymkent qalalyq Tótenshe jaǵdaılar departamenti qoǵammen baılanys tobynyń málimeterine silteme jasap habarlaıdy.
Jalpy ǵımarattardyń 3223 sharshy metr shatyry qulaǵan, 6 avtokólik zaqymdalǵan, 2016 jyly týylǵan bala zardap shekken.
Qarataý aýdany Nursat shaǵynaýdanynda, Qyzyl sý, Isfıdjab, Ótemis, Saıram, Shapyrashty turǵyn alaptarynda elektr qýaty sóngen. Avarııalyq-qalpyna - keltirý jumystaryn Qaınarbulaq, Saıram aýdandyq elektr stansalarynyń mamandary jumys atqaryp, saǵat 22:18-de atalǵan mekenjaılarǵa elektr qýaty qaıta qosyldy.
Oqıǵa bolǵan jerlerde Shymkent qalalyq Tótenshe jaǵdaılar departamentiniń jeke quramynan 24 adam, 7 tehnıka, «KazTransGaz» AQ Shymkent fılıalynyń 3 qyzmetkeri, 1 tehnıkasy, «Ońtústik Jaryq tranzıt» JShS-nyń 3 qyzmetkeri, 1 tehnıkasy, «Sý resýrstar marketıng» JShS-nyń 70 qyzmetkeri,10 tehnıkasy jumys atqarǵan.
Osy oqıǵa boıynsha Shymkent qalasy Tótenshe jaǵdatslar departamentinde jedel shtab qurylyp, táýlik boıy kezekshilik uıymdastyryldy. Departamenttiń jeke quramy daıyndyqqa keltirilip, kúsheıtilgen jumys rejımine aýystyryldy.
Aıta keteıik, Shymkent qalasy Tótenshe jaǵdaılar departamenti 2021 jylǵy 1 maýsymda ońtústik-batystan, batystan jyldamdyǵy sekýndyna 15-20 metr jel turatyny týraly 2021 jyldyń 31 mamyrynda aldyn alý eskertý jarııalaǵan.
Habarlama uıaly telefondarǵa SMS arqyly, «Dármen» mobıldi qosymshasy jáne telearnalardy ustap alý arqyly halyqqa, jergilikti atqarýshy organdary men mekemelerdiń basshylaryna jetkizilgen.
«2021 jylǵy 1 maýsymdaǵy jeldiń naqty jyldamdyǵy sekýndyna 26 metr boldy»,-delingen habarlamada.