Shymkentte qurylysshy turǵyn úıdiń segizinshi qabatynan qulap, mert boldy
ShYMKENT. QazAqparat - Shymkentte qurylysshy turǵyn úıdiń segizinshi qabatynan qulap ketti. Qalalyq jedel járdem aýrýhanasyna jetkizilgenimen, ol úsh kúnnen keıin jan tásilim etti, dep habarlaıdy QazAqparat HAA tilshisi.
Óńirdiń eńbek ınspektsııasy basqarmasynyń basshylyǵynyń sózinshe, qaıǵyly oqıǵa 26 tamyz kúni kúndizgi saǵat 11-ler shamasynda bolǵan.
«Aldyn ala málimetke sáıkes, qaıǵyly jaǵdaı Asar shaǵyn aýdany janyndaǵy toǵyz qabatty úıde bolǵan. 29 jastaǵy Hasan Ábdýsaıtov jańadan salynyp jatqan úıdiń segizinshi qabatyndaǵy terezeden qulap ketken. Ol montajdaý jumystaryn júrgizý kezinde súrinip ketip, qulaǵan degen boljam bar. Qazir osy oqıǵa boıynsha arnaıy komıssııa qurylyp, tekserý sharalary júrgiziledi. Qurylysshynyń óliminiń naqty sebepteri sol kezde belgili bolady»,-deıdi oOblystyq eńbek ınspektsııasy basqarmasy basshysynyń orynbasary Qaırat Tólebaev.
Túrli dene jaraqatyn alǵan qurylysshy aýrýhanaǵa jatqyzylǵanymen, es jımaǵan kúıi sol jerde jan tapsyrdy.
Dárigerlerdiń sózinshe, onyń jaǵdaıy óte aýyr bolǵan. Jasandy tynys alý apparatyna qosylǵanymen, beti beri qaramapty. Naýqas tamyzdyń 29-i kúni kóz jumǵan. Qazir óńirdiń tártip saqshylary osy jaıtqa qatysty tergeý sharalaryn bastap ketti. «Qurylysshynyń ólimi boıynsha bizge habarlama kelip tústi. Qazir jigittiń ólimine qatysty mán-jaılar anyqtalýda. Sondaı-aq osy oqıǵaǵa qatysty Qylmystyq Kodekstiń 156-baby 3-bóligi «Eńbekti qorǵaý qaǵıdalaryn buzý, abaısyzda adam ólimine ákep soqqan is-áreket» boıynsha is qozǵalyp, tergeý amaldary júrgizilip jatyr. Tergeý aıaqtalǵan soń qosymsha habarlaıtyn bolamyz», -deıdi oblystyq ІІD baspasóz qyzmetiniń jetekshisi Saltanat Qarakózova.
