Shymkentte qurylys ornynan adam súıekteri tabyldy
ShYMKENT. QazAqparat- Shymkentte ejelgi adamdardyń bas-súıekteri tabylǵan. Adam denesiniń qańqalary «Ońtústik» shaǵyn aýdanynda jeke turǵyn úıdiń aýlasynan shyqty, dep habarlaıdy «Qazaqparat» HAA aımaqtaǵy tilshisi.
Úı ıesi esik aldyna qora-jaı salmaqshy bolǵan. «Jerdi tereńdetip qazyp jatqan sátte, kenet adam súıegine uqsas zat tabyldy. Aqyryn qazǵanymyzda úsh adamnyń bas súıegi men qysh qumyralar taptyq. Shamamen munda ejelgi zamandaǵy bir úıdiń úsh adamy qatarynan jerlengen bolýy múmkin. Óıtkeni, kóne ǵurypqa sáıkes qabirge ydystardy qoıý sony kórsetedi», - deıdi jergilikti turǵyn Dáýren Abaev.
Tabylǵan zattar arheologtarǵa ótkizildi. Qurylys jumysy ýaqytsha toqtaǵan. Sebebi, mamandar zertteý jumystaryn júrgizbekshi.
Almas SULTAN
