Shymkentte QR Prezıdenti janyndaǵy Jastar saıasaty keńesiniń kóshpeli otyrysy bastaldy
Jalpy otyrystyń kún tártibinde qoǵamdyq sanany jańǵyrtý baǵdarlamasy aıasyndaǵy qazirgi qazaqstandyq jastardyń qundylyq paıymdary jáne ózekti aspektileri men jastardyń mádenı-demalys qyzmetterin uıymdastyrý jaıy qaraldy. Jıynda qoǵamdyq sanany jańǵyrtý jáne jastardyń mádenı- demalys qyzmetterin uıymdastyrý týraly Din isteri jáne azamattyq qoǵam, Mádenıet jáne sport mınıstrleri men «Jas Otan» jastar qanatynyń, «Qazaqstan-2050» jalpyulttyq qozǵalysy tóraǵalarynyń baıandamalary tyńdaldy.
Keńes músheleri Jastar saıasaty jónindegi keńestiń 2019 jylǵa arnalǵan jumys josparyn maquldady. Jıyn qorytyndysynda QR Memlekettik hatshysy Gúlshara Ábdiqalyqova birqatar mınıstrlikter men ákimderge tıisti tapsyrlamalar berdi.
«Elimizdiń Mádenıet jáne sport mınıstrligine Almaty, Astana qalalary men oblys ákimdikterimen birlesip jastardyń mádenı-demalys oryndaryn qajetti materıaldyq-tehnıkalyq bazamen nyǵaıtý, sportpen shuǵyldanýyna jaǵdaı jasaý, sporttyq mádenı úıirmelerge tegin qatysýyna qoldaý kórsetý, elimizdiń Mádenıet jáne sport, Bilim jáne ǵylym mınıstrligine jastar arasynda kitap oqýdy keńinen nasıhattap, kitaphanalarǵa, teatrlarǵa, murajaıǵa barýyna jaǵdaı jasaý, jańadan jaryq kórgen kitaptardyń keńinen taralýyna, nasıhattalýyna jaǵdaı jasaý, Aqparat jáne kommýnıkatsııalar mınıstrligine BAQ-ta jáne áleýmettik jelilerde jastar saıasatynyń damý barysy jáne jastarǵa qoldaý sharalary týraly aqparat taratý, jastarǵa jeńildikter men tómen baǵalar jaıly, sol oryndardaǵy jumystar jaıly aldyn ala tanystyryp otyrýdy tapsyramyn», - dedi Gúlshara Ábdihalyqova.
