Shymkentte «Qoshqar-ata» demalys aımaǵy ashyldy
ShYMKENT. QazAqparat - Búgin Shymkent «Astananyń 20 jyldyǵyna - 20 nysan» aktsııasy aıasynda Qoshqar ata ózeniniń jaǵalaýy paıdalanýǵa berildi, dep habarlaıdy QazAqparat tilshisi.
Jýyrda abattandyrý jumystary júrgizilgen ózenniń boıynda ótken sharaǵa oblys ákimi Janseıit Túımebaev pen qala ákimi Nurlan Saýranbaev, oblystyq jáne qalalyq máslıhat depýtattary men BAQ ókilderi, qala turǵyndary qatysty.
Jańa kelbetke engen jaǵalaýdyń ashylý rásimine kelgen qonaqtar, demalys aımaǵyn aralap, dán rıza bolysty. Qazir onda jaryqshamdar men oryndyqtar, rotondar ornatylyp, túrli aǵashtar egilgen.
Búgingi tańda demalys aımaǵyn tolyq aıaqtaý úshin memleket muqtajyna alynatyn turǵyn úıler men jer telimderine óteamaqy tóleý úshin qarjy bólinip, tıisti jumystar atqarylýda. Demalys aımaǵynyń ashylý saltanatyna qatysqan aımaq basshysy shymkenttikterdi búgingi sharamen quttyqtap, bolashaqta júzege asatyn jobalarmen tanystyrdy.
«Shahardyń shyraıyn asha túsetin Qoshqar ata jaǵalaýy - qala turǵyndarynyń súıikti ornyna aınalyp, múldem jańa keıipke enetin bolady. Óıtkeni, aldaǵy ýaqytta Qoshqar ata ózeni boıynda kópqabatty turǵyn úılerdiń qurylysy júrgizilip, Qarasý jáne Qoshqar-ata ózenderiniń boıy tolyq abattandyrylady. Jalpy «Eski qala» jobasy boıynsha Qoshqar ata ózeniniń jaǵalaýy demalys jáne qorǵaý aımaǵy bolyp qarastyrylǵan. Bul mań - Megapolıs atanǵan qalanyń tańdaýly, kórikti jerleriniń birine aınalmaq», - dedi Janseıit Qanseıituly.
