Shymkentte kóshe boıynda jarapazan aıtatyn balalar kólik qozǵalysyna kedergi jasap júr

ShYMKENT. QazAqparat - Shymkentte túngi ýaqytta kóshe kezip, jarapazan aıtatyn balalardyń sany azaımaı otyr. Ál-Farabı aýdanynda keshki ýaqytta jaramazan aıtyp júrgen taǵy 12 jasóspirim anyqtaldy, dep habarlaıdy QazAqparat.

Shymkent qalasy polıtsııa departamenti jergilikti polıtsııa qyzmeti basqarmasy ıývenaldy polıtsııa ınspektorlary kámelet jasqa tolmaǵan balalardyń arasynda quqyq buzýshylyqtyń aldyn alý úshin reıd júrgizip jatyr.

Onyń barysynda joldar men kóshe qıylystarynda kámelet jasyna tolmaǵandar adamdarǵa tıisý jaıttary anyqtalýda.

Osy rette túngi ýaqytta jaramazan aıtyp kóshede júrgen jasóspirimderdi anyqtaý maqsatynda reıd júrdi.

Nátıjesinde 14 sáýirde ál-Farabı aýdany boıynsha qoǵamdyq orynda jarapazan aıtyp júrgen 12 jasóspirim anyqtaldy.

Tártip saqshylary balalarǵa eskertý jasap, túsindirý jumystaryn júrgizdi.

«Jarapazan aıtamyn dep jasóspirimder kóshe boıynda jol júrý erejelerin óreskel buzyp, avtokólikterdiń júrýine kedergi jasap, óziniń jáne basqa jol qozǵalysyna qatysýshylardyń densaýlyǵy men ómirine qaýip tóndirýde. Qala turǵyndarynyń qaýipsizdigi men tynyshtyǵyn qamtamasyz etip, qylmystyq jaıttardy boldyrmaý jáne onyń aldyn alý maqsatynda kúndelikti reıd júrgizip otyramyz. Ul-qyz tárbıelep otyrǵan ata-ana retinde bárimiz balamyzdyń qaýipsizdigine alańdaımyz. Sondyqtan ár ata-anadan balalardyń is-áreketi men qozǵalysyn baqylaýda ustaýdy suraımyz», - deıdi ıývenaldy polıtsııa bólimshesiniń aǵa ınspektory polıtsııa maıory Rahymjan Irısbekov.

Buǵan deıin Shymkentte qoǵamdyq orynda jarapazan aıtyp júrgen 14 bala tabylǵanyn habarlaǵan edik.