Shymkentte qos kompanııa qoqysqa talasty
ShYMKENT. QazAqparat - Shymkentte qoqys shyǵaratyn eki kompanııa turǵyndardan «kórsetilgen qyzmet úshin qarjyny bizge tóleńder» dep talasyp jatyr, - dep habarlaıdy QazAqparat tilshisi.
Qalaǵa qarasty Maıatas eldi mekenindegi turǵyndar dál osyndaı kúıge tap bolǵan. Turǵyndar shyǵaratyn kúl-qoqysty «Qyran» áleýmettik kásipkerlik kooperatıvi men «Nur Olja» jekemenshik seriktestigi atalatyn qos birdeı mekeme tasymaldaıtyn kórinedi. Nátıjesinde qara halyq qaısysyna aqy tólerin bilmeı dal. «Qyzmet úshin qaryzsyńdar» degen olardyń biri turǵyndarǵa sot aldy eskertý hatyn úlestirip úlgeripti.
«Eki túıe súıkense, ortasynda shybyn ólediniń» kebin kıgen 500-ge tarta tútini bar Maıatas qalaǵa sońǵy jyldary qosylǵan eldi mekenderdiń biri. Bul aýyldan kúl-qoqys ta kem shyǵatynyn, óıtkeni kókónis qaldyǵy malǵa azyq, qaǵaz-qorabynyń otqa tamyzyq ekendigin aıtady jurt. Tek sońǵy úsh jylda ǵana halyq qoqys tasymaldaıtyn kompanııa qyzmetine júgine bastapty.
Aıadaı ǵana aýyldan osylaısha qos mekeme jarysyp júrip, qoqys jınaıdy. Qat-qat túbirtek te qabattasa kelip túsedi.
«Ekeýara túsinbestiktiń zardabyn nege biz kórýimiz kerek», - deıdi ashynǵan jurt. Aýyl azamattarynyń tabysy az. Kóbi kópbalaly otbasy sanatynan. Ár úıde kemi alty, kóbi on balaǵa deıin jetetinin aıtady qara halyq. Al áleýeti áljýaz top qos mekemege birdeı tólem jasaýǵa qaýqarsyz kórinedi. Endigi jetpegeni sotqa barý dep otyr.
Kompanııanyń biri máseleni sot sheshedi dep, qazyǵa júginse, ekinshisi tańdaýdy halyqtyń erkine bergen jón dep otyr.
Máseleniń mánin sheneýnikter túsindirgendeı boldy.
- Kásiptiń bul túri erkin aınalymǵa jiberilgen. Kim qaısysyn tańdaıdy. Halyq ózi sheshedi. Biz turǵyndardy májbúrlemeımiz. Kásipkerlerge de kedergi keltire almaımyz. Sondyqtan, «kelisip pishken ton kelte bolmaıdy». Kim qaısy kompanııany tańdaıdy, sonyń qyzmetine júgine bersin, - deıdi Shymkent qalasy Eńbekshi aýdany ákiminiń orynbasary Aleksandr Malahov.
Erlan Júnisbaıuly
