Shymkentte qos birdeı balalardy ońaltý ortalyǵy ashyldy
ShYMKENT. QazAqparat - Shymkentte qos birdeı balalardy ońaltý ortalyǵy ashyldy. Saýyqtyrý mekemelerinde tirek qımyly buzylǵan balalar emdeletin bolady, dep habarlaıdy QazAqparat tilshisi.
Endigi jerde jarymjan balalardyń ata-analary perzentterin emdetý úshin Astana men Almatyǵa sabylmaıtyn boldy. Ortalyqtardyń biri burynǵy «Qarlyǵash» balalar sanatorııiniń bazasynda ashyldy. Ǵımarat bir mezette 100 naýqasqa qyzmet kórsetedi. Munda 3 jasqa deıingi bóbekter em qabyldaı alady. Qazirdiń ózinde ortalyqta óńirdiń barlyq aýdandarynan kelgen tserebraldi sal aýrýy dıagnozymen esepte turǵan balalar em qabyldaýda. Olar jylyna eki retke deıin 25 kún osynda saýyǵýyna jaǵdaı jasalǵan. Al, ekinshi ortalyq 3 jastan 14 jasqa deıingi balalarǵa arnalǵan. 100 naýqasty emdeýge qaýqarly mekemede balalardyń tirek qımyl júıesiniń jumysyn jaqsartý úshin LOKOSTEIShN robottandyrylǵan qurylǵysy qoıylǵan. Sonymen birge, balalar úshin túrli mıneraldar qosylǵan emdik basseın jumys isteıdi.
Aıta keteıik, oblysta 2,5 myńdaı bala júıke-tirek qımylynyń buzylýyna baılanysty em qabyldaý kezeginde tur. Al, jańadan ashylǵan nysandar osy qajettilikti ótemek.
