Shymkentte qorshaǵan ortany lastaǵan 18 qoǵamdyq kólik júrgizýshisi jaýapqa tartyldy

ShYMKENT. QazAqparat - Shymkentte qorshaǵan ortany lastaǵany úshin 18 qoǵamdyq kóliktiń júrgizýshisi jaýapqa tartyldy. Jolaýshylardy tasymaldaýdy júzege asyratyn kólikterdegi kemshilikter apattylyqtyń aldyn alý jáne qaýipsizdik deńgeıin arttyrý maqsatynda uıymdastyrylǵan «Avtobýs» jedel-profılaktıkalyq is-sharasy kezinde anyqtalǵan, dep habarlaıdy QazAqparat tilshisi.

Shymkent qalalyq PD baspasóz qyzmetiniń málimetinshe, atalǵan is-shara barysynda jalpy sany 785 quqyqbuzýshylyq tirkelgen. Atap aıtqanda, avtobýstarda lastaýshy zattardyń bolýy, jolaýshylardy jáne júkterdi tasymaldaý qaǵıdalaryn buzý sııaqty kemshilikter anyqtalǵan. Sondaı-aq, júrgizýshiler tıisti ruqsat qaǵazynsyz qaıta jabdyqtalǵan kólik quralyn basqaryp, baǵytqa shyǵar aldynda tehnıkalyq jáne medıtsınalyq tekserýden ótpegen bolyp shyqty.

Sonymen qatar rýlde otyryp, uıaly telefonmen sóılesken jáne aldyndaǵy kólikterdi ruqsat etilmegen jerde basyp ozý nemese manevr jasaǵan júrgizýshiler kezdesken. Keıbiriniń qoǵamdyq kólikti saqtandyrý polısinsiz júrgizgeni belgili boldy.

Jedel-profılaktıkalyq is-shara nátıjesinde 11 kólik aıypturaqqa qoıylyp, avtobýs parkteriniń 10 laýazymdy tulǵasy ákimshilik quqyqbuzýshylyq jaýapkershilikke tartylǵan.