Shymkentte qorshaǵan ortaǵa 2 mlrd teńge kóleminde zalal keltirildi

ShYMKENT. QazAqparat - Shymkentte prokýrorlar turmystyq qatty qaldyqtardy jınaý, shyǵarý jáne kómý boıynsha qyzmetti uıymdastyrý jumystarynyń zańdylyǵyna tekserý júrgizdi. Nátıjesinde jergilikti atqarýshy organdardyń qatty turmystyq qaldyqtarmen jumys isteýdiń barysynda zańbuzýshylyqtarǵa jol bergendigi anyqtaldy, dep habarlaıdy QazAqparat.

Tekserý barysynda 28 zańsyz qatty turmystyq qaldyqtardy saqtaý oryndary bar ekeni anyqtaldy. Shymkent qalasy boıynsha zańsyz qaldyqtardy saqtaý oryndarynda 51 myń tonnadan astam qoqystyń ornalastyrylǵandyǵy belgili boldy. Sonyń saldarynan qorshaǵan ortaǵa 2 mlrd. teńge kóleminde zalal keltirilgen. Sonymen qatar, qadaǵalaýshy organ ókilderi jergilikti atqarýshy organ basshylarynyń qaldyqtardy jınaý, alyp ketý jáne ornalastyrýǵa qatysty tarıfterdi bekitpegenin aıtyp otyr. Budan bólek, qoqystardy qaıta óńdeý zaýytynyń qyzmetine ruqsat qujattary bolmaı shyqqan. Qazir bul zaýyttyń jumysyna shekteý qoıyldy.

Sondaı-aq prokýrorlar barlyq qatty turmystyq qaldyqtardy saqtaý nysandarynyń qyzmetterinde ekologııalyq jáne sanıtarlyq talaptardyń saqtalmaǵandyǵyn jáne bıýdjet qarajatynyń tıimsiz paıdalanylýyna qatysty derekterdi anyqtady. Qadaǵalaýshy organ ókilderi qoldanǵan sharalardyń nátıjesinde 53 tulǵa túrli deńgeıdegi jaýapkershilikke tartylyp, olarǵa 3 mln. teńge kóleminde ákimshilik aıyppuldar salyndy.

Tekserýdiń nátıjesinde oblys ákiminiń atyna zań buzýshylyqtardy joıý týraly usynystar engizilip, quzyrly organdarǵa bul saladaǵy jaǵdaıdy jaqsartý úshin birqatar naqty tapsyrmalar berildi.