Shymkentte koronavırýstan kóz jumǵan adam júk kóliginiń júrgizýshisi bolǵan
Aıta keteıik, búgin úshinshi megapolıste koronavırýs juqtyrǵan bir naýqas qaıtys bolǵan edi. Ol 1962 jyly týǵan Túrkistan oblysy. Qazyǵurt aýdanyna qarasty Rabat aýylynyń turǵyny.
«Aýyr júk kóliginiń júrgizýshisi tranzıtpen «Qaraǵandy-Novosbir» baǵyty boıynsha jol júrip bara jatqanda ystyǵy kóterilip, dáriger kómegine júgingen. Naýqas 11 sáýir kúni Shymkent qalasynyń juqpaly aýrýhanasyna jatqyzylǵan. 58 jastaǵy azamat ınfektsııalyq aýrýhanasynyń jansaqtaý bólimine jatqyzylǵan. Ol densaýlyǵynyń nasharlaýyna baılanysty reanımatsııalyq bólimniń IVL apparatyna qosylǵan. Naýqas buǵan deıin arterıaldyq gıperenzııa aýrýymen dıspanserlik esepte tirkeýde turǵan. Vırýs juqtyrǵan azamatqa emdeý hattamasyna sáıkes qajetti em sharalary júrgizilip, Respýblıkalyq mamandarmen bireshe ret keńes júrgizilgen. Búgin tańǵy saǵat 07-ler shamasynda naýqas reanımatsııalyq bólimde qaıtys bolǵan»,- dedi Aıgúl Bekbaýova.
Qalalyq densaýlyq saqtaý basqarmasy basshysy orynbasarynyń málimetinshe, naýqaspen qarym qatynasta bolǵan uly Shymkent qalasyndaǵy juqpaly aýrýlar aýrýhanasyna statsıonarǵa jatqyzylǵan. Búgin sondaı-aq, qalada taǵy bir adamnyń qaýipti indet juqtyrǵany anyqtaldy.
«20 jastaǵy naýqas Shymkent qalasynyń turǵyny. Ol 13 sáýir kúni «Varshava-Aqtóbe- Shymkent» áýe reısimen Shymkent qalasyna ushyp kelgen. Ol kele salysymen oqshaýlanyp, karantınge jatqyzylǵan. 14 sáýir kúni synamalyq nátıjeleri oń nátıje kórsetti. Naýqaspen bir reıste ushyp kelgen 9 jolaýshy men 2 bort serik oqshaýlanyp, medıtsınalyq baqylaýǵa alyndy. Búgingi tańda qalada koronavırýspen 39 jaǵdaı tirkeldi»,- dedi Aıgúl Bekbaýova.