Shymkentte koronavırýs juqtyrǵandardyń qatarynda 13 jastaǵy jasóspirim bar

ShYMKENT. QazAqparat – Shymkentte sońǵy táýlikte taǵy úsh adamnyń COVID-19 ınfektsııasyn juqtyrǵany anyqtaldy. Dárigerler naýqastardyń qatarynda 13 jastaǵy jasóspirim bar ekenin aıtady, dep habarlaıdy QazAqparat tilshisi.

Qalalyq tótenshe jaǵdaılar shtabynyń málimetinshe, qaýipti indet juqtyrǵandardyń barlyǵy da buǵan deıingi naýqaspen qarym-qatynasta bolǵan. Olar karantındik statsıonarǵa jatqyzylyp, zerthanalyq synamalar alynǵan.

«Bir naýqas 2006 jyly týǵan jasóspirim bolsa, ekeýi 1967 jáne 1971 jyly týǵan áıelder. Dıagnostıkalyq zertteý qorytyndysy olardan COVID-19 vırýsyn anyqtady. Qazirgi tańda naýqastardyń jaǵdaılary qanaǵattanarlyq. Bekitilgen hattamaǵa sáıkes tıisti em júrgizilýde. Naýqastarmen qarym-qatynasta bolǵan adamdar anyqtalyp, barlyǵy medıtsınalyq baqylaýǵa alynýda. Aýrý oshaqtarynda epıdzertteý jáne dezınfektsııalyq jumystar júrgizilýde» delingen habarlamada.

Aıta keteıik, Shymkentte COVID-19 koronavırýstyq ınfektsııasyna shaldyqqan adamdardyń sany 23-ke jetti.