Shymkentte kópqabatty úıdiń jertólesinen adamnyń máıiti tabyldy
ShYMKENT. QazAqparat - Shymkentte kópqabatty úıdiń jertólesinen adamnyń máıiti tabyldy. Múrdeni tazalyq jumystaryn júrgizgen mekeme qyzmetkerleri taýyp alypty, dep habarlaıdy QazAqparat HAA tilshisi.
Oqıǵa búgin tańerteń saǵat 10-dar shamasynda bolǵan. Asanbaı Asqarov kóshesindegi kópqabatty úılerdiń birinde káriz qubyrlaryn retke keltirmek bolǵan jumysshylar birneshe bólikke bólingen adamnyń máıitin kórip qalǵan. Basy da bir shette jatypty. Olar jertóleden atyp shyǵyp, bolǵan jáıtti úıdiń turǵyndaryna aıtady. Barlyǵy jabylyp dereý polıtseılerge habar bergen. Artynsha tártip saqshylary jetip, oqıǵa ornyn qorshaýǵa aldy. Kýágerlerdiń sózinshe, múrde uzaq ýaqyt jatyp qalǵandyqtan, ıistenip ketken. Ári onyń jas shamasy men jynysyn da bilý qıynǵa soǵypty. Úıdiń turǵyndary osydan bes jyl buryn jertóleden ólekseniń ıisi shyǵyp, ony mamandar dárilegenin aıtady. Sodan beri jertólege tiri jan túsip kórmepti. Qalaı bolǵanda da Abaı aýdandyq polıtsııa bóliminiń ishki ister qyzmetkerleri ony máıithanaǵa alyp ketti.
«Qazir máıittiń tabylýy faktisine baılanysty qylmystyq is qozǵalyp, sotqa deıingi tergeý amaldary júrgizilýde. Birneshe sot medıtsınalyq saraptamalar taǵaıyndaldy. Ázirge men sizderge máıittiń er adamdyky nemese áıeldiki dep aıta almaımyn. Sebebi, onyń jatyp qalǵanyna kóp ýaqyt bolǵan. Sondyqtan tıisti sheshimderdiń barlyǵy sot medıtsınalyq saraptamalardyń qorytyndysy boıynsha qabyldanatyn bolady», - deıdi oblystyq ІІD baspasóz qyzmetiniń jetekshisi Saltanat Qarakózova.
