Shymkentte kópqabatty úıdiń astyndaǵy alty saýda dúńgirshegi órtenip ketti

ShYMKENT. QazAqparat - Shymkentte kópqabatty úıdiń astyndaǵy alty saýda dúńgirshegi órtenip ketti. Kıim, aıaq kıim jáne uıaly telefondardyń aksessýarlary satylatyn saýda nysandary plastık jáne profnastılden salynǵan, dep habarlaıdy QazAqparat tilshisi.

Qalalyq TJD baspasóz qyzmetiniń málimetinshe, órt keshki saǵat 18:02-de Rysqulov kóshesinde bolǵan. Oqıǵa ornyna órt sóndirý qyzmetiniń 45 qyzmetkeri men 8 tehnıkasy, Apattar medıtsınasy ortalyǵy fılıalynyń 1 brıgadasy jumyldyryldy.

«Oqıǵa ornyna jetken alǵashqy órt sóndirý bólimderi jalpy aýmaǵy 250 sharshy metrdi quraıtyn dúńgirshekterde kıim, aıaq kıim jáne uıaly telefondardyń aksessýarlary satylatyndyǵyn anyqtady. Jalyn sharpyǵan aýmaq 150 sharshy metr. Jalyn 18:53-te oqshaýlanyp, saǵat 19-14-te tolyǵymen sóndirildi. Zardap shekkender men qaıtys bolǵandar joq. Órttiń shyǵý sebebi anyqtalýda»,- delingen habarlamada.

Vıdeodan alynǵan kadr