Shymkentte kópbalaly otbasylar men jetim balalar baspanaly boldy

ShYMKENT. QazAqparat - Búgin «Shymkent sıtı» qalashyǵynda ornalasqan 9 qabatty turǵyn úılerdiń páter kilti tapsyryldy, dep habarlaıdy QazAqparat qala ákiminiń baspasóz qyzmetine silteme jasap.

540 jaldamaly páter kópbalaly otbasylarǵa, jetim jáne ata-ana qamqorlyǵynsyz ósken balalarǵa jáne basqa da áleýmettik az qamtylǵan azamattarǵa berildi. Bul Elbasy Nursultan Nazarbaev belgilep bergen elimizdiń jańa áleýmettik saıasaty «Áleýmettik qamqorlyq» memlekettik baǵdarlamasy asıasynda júzege asyrylyp otyr.

Kópbalaly otbasylarǵa baspana kiltin tapsyrǵan qala ákimi Ǵabıdolla Ábdirahymov olardyń «Shymkent sıtı» qalashyǵyndaǵy alǵashqy turǵyndar ekenin aıtty.

«Shymkent sıtı» qalashyǵy shaharymyzdyń jańa ákimshilik-iskerlik, mádenı ortalyǵyna aınalady. Bul qalashyqta halyq jaıly ómir súrýi úshin barlyq jaǵdaı jasalady. Áleýmettik nysandar - mektepter men balabaqshalar, emhanalar jáne qala turǵyndary tynyǵatyn demalys oryndary, kıno-kontsert zaly, sport kesheni, kongress holl jáne basqa da kóptegen ǵımarattar boı kóteredi. Bizdiń eń basty maqsatymyz - qala turǵyndary úshin qolaıly jaǵdaı jasaý»,-dedi ákim.

Aıta keteıik, Shymkentte jyl sońyna deıin 828 páterli 14 arendalyq kommýnaldyq turǵyn úı paıdalanýǵa beriledi. Budan basqa, «7-20-25» ıpotekalyq baǵdarlamasy arqyly 246 páterli 5 kredıttik turǵyn úı berilse, «Turǵyn úı qurylys jınaq banki» arqyly Nursát turǵyn alabynda 656 páterli 11 kredıttik turǵyn úı, «Shymkent» ÁKK arqyly 1016 páterli 24 kredıttik turǵyn úı tapsyrylady.