Shymkentte kómir tapshylyǵy joq. Ákimdik málimetti teriske shyǵardy
ShYMKENT. QazAqparat - Shymkent ákimdigi qalada kómir tapshylyǵy týyndaǵany týraly aqparatty joqqa shyǵardy, dep habarlaıdy QazAqparat tilshisi.
Keshe buqaralyq aqparat quraldarynda kómir tapshylyǵyna qatysty aqparattar jaryq kórgennen keıin, búgin ákimdiktiń baspasóz qyzmeti resmı málimdeme taratty. Qala basshylyǵyna sensek, shym shahar qatty otynmen qamtamasyz etilgen.
«Barlyq bazada kómir jetkilikti. Sonymen qatar, búgin, 12 qańtarda qalaǵa 15 vagon kómir jetkizildi. Árbir vagonnyń salmaǵy 96 tonnany quraıdy. Turǵyn úı-kommýnaldyq sharýashylyǵy (TÚKSh) bólimi turǵyndardan kelip túsetin ótinishterdi únemi baqylaýǵa alyp otyrady, sonymen qatar aýdandyq ákimdikke túsetin ótinishter de nazardan tys qalmaıdy. Ákimdikke ne bolmasa ákimdiktiń áleýmettik jelilerdegi resmı paraqshalaryna eshbir turǵyn kómir tapshylyǵy jóninde ótinish qaldyrmaǵan. Osyǵan baılanysty, sizder osy sekildi ne ózge de máseleler boıynsha jergilikti aýdan ákimdigine, TÚKSh bólimine, WhatsApp nómirine nemese ákimdiktiń áleýmettik jelidegi resmı paraqshalaryna suraý qaldyra alasyzdar», - delingen habarlamada.
Aıta keteıik, kúni keshe qaladaǵy jergilikti arnalar men aqparattyq saıttarda Shymkentte kómir qory taýsylǵandyǵy jóninde aqparattar tarady. Atap ótilgendeı, tapshylyq Qaraǵandydan kómirdiń ýaqytyly jetkizilmeýinen týyndaǵan.
