Shymkentte komendanttyq saǵatty buzǵan 33 turǵyn jaýapkershilikke tartyldy
Qalada qylmyskerlerdi anyqtaý maqsatynda ekstremızm jáne kóshi-qon jelisi boıynsha jedel-izdestirý is-sharalary júrgizilýde. Blok beketterde 7000-nan astam avtokólik tekserilgen. Nátıjesinde jappaı tártipsizdikke qatysty degen kúdikpen 8 azamat ustaldy.
«Kúdiktilerden 6 patrony bar 16-mm kalıbrli tumsyǵy kesilgen qarý, 5 jaýyngerlik patrony bar 9-mm jaýyngerlik kalıbrge qaıta jasalǵan 1 travmatıkalyq tapansha, 7,62-mm kalıbrli 67 jaýyngerlik patron jáne 5,45-mm kalıbrli 3 jaýyngerlik patron tárkilendi. Sondaı-aq, tártipsizdikter kezinde Almaty oblysynyń «Aport« Saýda ortalyǵynan urlanǵan 23 dana «Aıfon 11-PRO« jáne 3 dana «Samsýng A-25« markaly jańa uıaly telefondar tárkilendi. Barlyq qozǵalǵan qylmystyq ister boıynsha jappaı tártipsizdikterdiń 52 qatysýshysy ýaqytsha ustaý ızolıatoryna qamaldy», - dedi Shymkent qalasy polıtsııa departamentiniń bastyǵy, general maıor Eraly Jumahanbetov.
Qalada jappaı tártipsizdik oryn alǵannan beri polıtsııaǵa 2716 adam jetkizilgen. 177 azamat ákimshilik jaýapkershilikke tartylsa, olardyń 175-i 15 táýlikke qamalyp, 2 adamǵa aıyppul salynǵan.
Qazirgi tańda Shymkent qalasynda jaǵdaı turaqty. Qalanyń tynys-tirshiligin qalpyna keltirý maqsatynda polıtsııanyń qarýly kúzetiniń súıemeldeýimen «Halyq», «Jýsan», «Kaspı» bankteriniń bankomattary toltyrylýda.
Polıtsııa departamentiniń áskerı bólimderi Tótenshe jaǵdaılar jónindegi departamenttiń kúshterimen birlesip kúsheıtilgen rejımde jumys isteýde. Qala shekarasynda buǵattaý beketteri qoıylyp, komendanttyq saǵat ornatyldy. Strategııalyq nysandardy kúzetý kúsheıtilgen.
