Shymkentte kolledj stýdentine álimjettik kórsetkenderge qatysty tergeý sharalary bastaldy
ShYMKENT. QazAqparat - Shymkentte kolledjdiń joǵary kýrs stýdentin páterge qamap alyp, álimjettik kórsetkenderdiń jeke tulǵalary anyqtaldy. Qazir tártip saqshylary olardyń qaı oqý ornynda oqıtynyn anyqtady, - dep habarlaıdy QazAqparat HAA tilshisi oblystyq ІІD baspasóz qyzmetine silteme jasap.
Departamenttiń baspasóz qyzmeti jetekshisi Saltanat Qarakózovanyń sózinshe, oqıǵa osy jyldyń qańtar aıynda Shymkenttegi jaldamaly páterlerdiń birinde bolǵan.
«Áleýmettik jelilerge taraǵan beınetúsirilimdegi jábirlenýshi Saryaǵash aýdanynyń 1997 jyly týǵan turǵyny, kólik-tehnıkalyq kolledjiniń 4-kýrs stýdenti ekeni anyqtaldy. Alaıda isti tergeý barysynda ol polıtsııa bólimine aryz jazýdan bas tartyp, bul oqıǵany oıyn dep túsindirip otyr», dedi S. Qarakózova.
Al, ony uryp-soqqan ári vıdeony túsirgen stýdent kásibı-tehnıkalyq kolledjdiń 2-kýrsynda oqıtyny anyqtaldy. Ol 18 jasta, Báıdibek aýdanynyń týmasy ári buǵan deıin de jasaǵan qylmysy úshin jazasyn ótep júrgen kórinedi. Atap aıtqanda, 2015 jyly qylmystyq kodekstiń 106-baby boıynsha sottalyp, eki jylǵa bas bostandyǵy shektelgen. Sondaı-aq qazirgi tańda tonaýǵa qatysy bar kúdikpen isi Abaı polıtsııa bóliminde tergelýde eken. Degenmen kúdikti jigit ata-anasynyń kepil bolýymen bosatylǵan.
Osy oqıǵaǵa qatysty shuǵyl izdestirý jumystaryn júrgizgen krımınaldy polıtsııa basqarmasynyń qyzmetkerleri seziktiniń janynda bolǵandardyń da tulǵasyn anyqtady. Qazir osy faktiniń mán-jaıy tergelýde.
Aıta keteıik, taıaýda jas jigittiń soqqyǵa jyǵylǵan vıdeosy áleýmettik jelige tarap ketken bolatyn. Keıinnen bul beınetúsirilimdi Shymkentte kolledj stýdentteri túsirgen bolyp shyqty. Olar ózderine álimjettik kórsetken joǵary kýrs stýdentin ózderinshe jazalamaq bolyp, páterge alyp barǵan. Aralarynan bir jigit shyǵyp, álgi stýdentti ózdiginshe jazalaǵan.
