Shymkentte kólikterdi urlap, reseılik nómirlermen satqan kúdikti ustaldy
«Shymkenttik polıtseıler bir úlgidegi 11 jeńil kólikti urlap ketken uryny ustady. Sońǵy 4 aıda Shymkent qalasynyń turǵyndarynan polıtsııaǵa Daewoo Nexia markaly avtokóliktiń urlanǵandyǵy týraly aryz túse bastaǵan. Aıta ketý kerek, barlyq urlanǵan kólikter dabyl belgisimen jabdyqtalmaǵan jáne jaryqtandyrý men beınebaqylaý kameralary joq aýlalardan urlanǵan», - dedi remı ókil.
Onyń aıtýynsha, qylmystyq izdestirý kezinde tergeýshiler barlyq faktilerdi jan-jaqty zerdelegen. Syrtqy beınebaqylaý kameralarynan beınematerıaldar alynyp, zerdelenip, olar boıynsha barlyq oqıǵalardyń hronologııasy qalpyna keltirilgen.
«Nátıjesinde, qylmysty baıqatpaý úshin kólikterdi tańerteńgi saǵat 4-ten 6-ǵa deıin bir adam urlaǵany anyqtalǵan. Ol qalaǵa keshki saǵat 8-de kelip, qaýipsizdik júıeleri boıynsha nashar avtokólikterdi izdegen. Júrgizilgen aýqymdy jedel-izdestirý jumystarynan keıin, kólik urlyǵyna kúdiktini Shymkent qalasynyń Ál-Farabı aýdanynyń krımınaldyq polıtsııa qyzmetkerleri anyqtap, ustady», - dedi N. Oraz.
Kúdikti ýaqytsha ustaý ızolıatoryna qamaldy, qylmysqa yqtımal qatysýshylar anyqtalýda.
«Keıin onyń qarapaıym syzǵyshtyń kómegimen avtomobılderdi ashqany belgili boldy. Sodan keıin ol otaldyrý qulpyn ashyp, qozǵaltqyshty iske qosyp, mashınany minip ketip otyrǵan. Sonymen qatar ol kólikterdiń nómirlerin sheship, onyń ornyna ınternet arqyly satyp alynǵan Reseı Federatsııasynyń jalǵan nómir belgilerin taqqan. Urlanyp, basqa adamdarǵa satylǵan 6 kólikti polıtsııa tárkilep, ıelerine qaıtaryp berdi. Sondaı-aq, 2 avtomobıl bólshektelip satylǵany anyqtaldy. Qalǵan 3 avtokólik áleýmettik jeliler arqyly satylǵan, qazirgi ýaqytta olardy izdeý jumystary júrgizilýde. Tergeý amaldary jalǵasady», - dedi resmı ókil.