Shymkentte kólik qaqqan balalar: Eki jetkinshek palataǵa aýystyryldy
ShYMKENT. QazAqparat - Shymkentte kólik qaǵyp ketken eki bala jansaqtaý bólimshesinen palataǵa aýystyryldy. Bul týraly Túrkistan oblystyq balalar aýrýhanasy bas dárigeriniń orynbasary Bolat Nusqabaev málimdedi, dep habarlaıdy QazAqparat tilshisi.
Bas dárigerdiń orynbasarynyń aıtýynsha, keshe jol-kólik oqıǵasy saldarynan aýrýhanaǵa 6 jáne 11 jasar eki qyz túsken. Alǵan jaraqaty aýyr bolǵandyqtan ekeýi de birden jansaqtaý bólimine jatqyzylǵan.
«6 jasar qyz bas mı jaraqatyn alǵan, jaǵy synǵan. Sondaı-aq, 11 jasar qyz da bas mı jaraqatymen tústi. Onyń bas súıegi jarylǵan, shúıdesi synǵan. Ekeýi de emin tolyqtaı aldy. Jaǵdaılary qalypqa tústi. Búgin bólimshege aýystyrdyq»,- deıdi Bolat Nusqabaev.
Eske salaıyq, jol-kólik oqıǵasy keshe kúndizgi saǵat 15.30 shamasynda bolǵan. Shymkenttegi avtoturaqtardyń birinde «Opel Kadett» avtokóliginiń júrgizýshisi kámelet jasyna tolmaǵan 6 balany qaǵyp ketip, saldarynan aýyr soqqy alǵan eki jetkinshek aýrýhanaǵa jetkizildi. Al, qalǵan 4 bala úıine qaıtarylǵan.
Qalalyq PD osy oqıǵa boıynsha birneshe saraptama taǵaıyndalǵanyn, atalǵan jaıt boıynsha QR QK 345-baby, 2-bóligimen sotqa deıingi tergeý amaldary júrgizilgenin habarlady.
