Shymkentte kók tiregen záýlim úıler boı kóteredi
ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev Qytaı eliniń delegatsııasymen kezdesti. Jıynda qytaılyq «Shanhaı konstrakshn» kompanııasynyń ókilderi óńir basshysyna «Shymkent sıtı» qalashyǵynyń mańynda salynatyn turǵyn úı kesheniniń jobasyn tanystyrdy, dep habarlaıdy oblys ákimdiginiń baspasóz qyzmeti.
Aıta ketý kerek, atalǵan kompozıtsııanyń ortalyǵy retinde tóbesi kók tiregen 57 qabattan turatyn eki kópqabatty úı salý qarastyrylýda.
«Shanhaı-Taýer» jáne «Shymkent-Taýer» dep atalatyn munaralar atalǵan eki qalanyń dostyq sımvoly ispettes bolmaq. Jobanyń jalpy kólemi 300 myń sharshy metrden astam. Qytaılyq ınvestorlardyń aıtýynsha, atalǵan turǵyn úı keshenin salý ıdeıasy shyǵys pen batys kópesteriniń ejelgi saýda joly bolǵan Uly Jibek jolynyń tarıhyna negizdelgen. Bul joldyń boıyndaǵy shaharlardyń biri qazirgi Shymkent qalasy. Al turǵyn úı kesheninde Uly Jibek jolyndaǵy kóne qalalar - Otyrar, Saýran, Syǵanaq, Saıram, Sozaq atymen atalatyn ejelgi oramdar (kvartal) salynbaq.
Kásipkerlermen bolǵan kezdesýde oblys ákimi óńirimizdiń búginge deıin jetken jetistikteri men ınvestıtsııalyq múmkindikterin atap ótip, ásirese, aımaqta otandyq jáne sheteldik ınvestorlar úshin qolaıly jaǵdaı jasalǵanyn jetkizdi. Munan bólek, ol ákimdiktiń atalǵan jobany qoldaıtynyn jáne ony iske asyrýda jan-jaqty qoldaýlardyń bolatynyn aıtty.
Aıta ketý kerek, «Shanhaı konstrakshn» kompanııasy Qytaıdaǵy qurylys salasynda eń úzdik kompanııalardyń ondyǵyna kiretin, osy salada 60 jyldan astam tájirıbesi bar uıym. Bul kompanııa óz jumysynda qurylystan bólek, nysandardy paıdalanýǵa berý men olardyń dızaıny boıynsha, sonymen qatar, konsaltıng qyzmetimen aınalysady.
