Shymkentte kógildir otynsyz qalǵan 400 úıge gaz berile bastady

ShYMKENT. QazAqparat - Shymkentte júk kóliginiń kesirinen kógildir otynsyz qalǵan 400 úıge qaıta gaz berile bastady. Bul týraly qala ákimdiginiń baspasóz qyzmeti málimet taratty, dep habarlaıdy QazAqparat tilshisi.

«Gaz qyzmetiniń mamandary túni boıy jóndeý jumystaryn júrgizip, gaz qubyryn qaıta qalpyna keltirdi. Osy oraıda turǵyndar nazaryna: Eger de gaz qubyryn soǵyp ketken ne zııan keltirgen júrgizýshini baıqasańyz, avtokóliktiń markasy men memlekettik nómirin jazyp alyp, «QazTransGaz Aımaq» OQO fılıalyna habar berińiz», - delingen habarlamada.

Eske salaıyq, keshe keshki saǵat 19.40 shamasynda Saıram men Belınskıı kósheleriniń qıylysynda aýyr júk kóligi ortasha qysymdaǵy gaz qubyryn soǵyp ketti. Saldarynan eki kósheniń boıynda ornalasqan 400-ge tarta úı kógildir otynsyz qalǵan edi. Artynsha qala ákimdigi men «KazTransGaz Aımaq» OQOF barlyq turǵyndarǵa sharýashylyqta qoldanystaǵy gaz qurylǵylaryn sóndirip qoıýdy suraǵan.