Shymkentte qoǵamdyq kólik tarıfin kóterýge moratorıı jarııalandy
ShYMKENT. QazAqparat - Shymkentte qoǵamdyq kólik tarıfin kóterýge baılanysty moratorıı jarııalandy. Bul týraly qala ákimdiginde qoǵamdyq kólik boıynsha ótken jınalysta aıtyldy, dep habarlaıdy QazAqparat tilshisi.
Qala ákimdigi baspasóz qyzmetiniń málimetinshe, jolaýshy tasymaldaýshy keı baǵyttarda qyzmet kórsetýge túzilgen sharttar jańartylýda. Al, sharttary buzylǵan alty baǵyt boıynsha mamyr aıynyń basynda konkýrs uıymdastyrylady. Jıyn barysynda shym shahardaǵy №112-shi kvartal, «Tekesý», «Altyntóbe», «Aqjaıyq» «Dostyq-2», turǵyn alabtaryna júrgiziletin áleýmettik mańyzy bar 10 avtobýs baǵytynyń taǵdyry da mamyrda uıymdastyrylatyn konkýrsta sheshiletini aıtyldy. Basqosýda qala ákimi Nurlan Saýranbaev qoǵamdyq kólikterdiń tehnıkalyq jaǵdaıy men sanıtarlyq tazalyǵynyń talaptarǵa saı bolýyn eskertti. Júrgizýshiler men kondýktorlardyń biryńǵaı kıimdi jáne qyzmettik mádenıetti saqtaýyn, qozǵalys kesteleriniń keshki ýaqyttarda oryndalýyn qatań baqylaýǵa alýdy tapsyrdy. Shahar basshysy sondaı-aq jolaýshylar tasymaldaýshylarǵa jol júrý erejelerin buzǵan jáne basqa da talaptardy oryndamaǵan jaǵdaıda kólik kompanııalarymen zańǵa sáıkes kelisimsharttar buzylatynyn atap ótti. Jaýapty mamandarǵa qaladaǵy ıntellektýaldy baǵdarshamdar sanyn arttyryp, zańsyz uıymdastyrylǵan taksı turaqtaryn joıýdy júktedi.
